Hopi kas na Kòrsou ta manera un fòrnu; paden mas kayente ku pafó

Un di e arkitektonan ku e desaroyá nos hospital nobo ta e yu di Kòrsou Lyongo Juliana. E ta biba na Hulanda pero ku su ofisina na Kòrsou ku proyektonan riba diferente islanan den Karibe. Sona, e fundashon pa desaroyo di Antia, na nòmber di gobièrnu a kontratá Ballast Nedam pa konstruí hospital. EGM architects i tambe e partner lokal OeverzaaijerLyongo Architects a kolaborá den yega na e diseño pa e hospital nobo.

 

24 aña arkitekto….

Lyongo Juliana den entrevista di Djasabra a bisa di tin algu mas ku 24 aña komo arkitekto.  Hospital nobo ta e proyekto di mas grandi ku e tabata responsabel final pe, ounke el a a traha pa kasi 7 aña na Amsterdam pa un di e ofisina di arkitektura mas grandi di Hulanda e tempu ei, riba proyektonan grandi pero no komo esun finalmente responsabel. Lyongo tin 2 aña i mei kaba ta biba bèk na Ulanda, pero promé ku esei el a asta duna lès na Universidat na Kòrsou. Ounke e ta biba na Ulanda nan ta traha ku bista riba Karibe. E intenshon ta pa sigui amplia den Karibe sigui hasi proyektonan den Karibe. Nan ta usando loke nan a siña den e proseso aki tambe den otro proyektonan. Nan ke sigui ku e saber di un hospital den proyektonan den Karibe. Nan ta hasi trabou na Aruba na e haf di kònteiner, tahando un plan urbano. Nan ta na St. Maarten, Saba i Boneiru proyektonan públiko i privá. Nan konosé nos islanan.


E diseño….

E diseño di nos hospital nobo CMC a kana un kaminda largu. Tin dos ekipo di arkitekto ku a traha na e proyekto aki ku ta OeverzaaijerLyongo Architects i na otro banda EGM architects. E proseso tabata unu di diseño, konstruí i mantené kaminda  tabatin un lista di kasi 8 mil eksigensia i mester a traha un diseño i proba di por trahe pa 108 mion dòler. E proseso a kuminsá na Jan Noorduynweg i promé ku a pone nada riba papel e proyekto a muda pa e tereno di Amstel kaminda nan a traha un diseño definitivo na yüli 2013 i pa sèptèmber 2013 riba un djabièrnè mainta den un reunion a pidié pa trasladá e edifisio di Amstel pa Otrobanda i e mester a duna un kontesta su djaluna mes. Nan mester a hasi un análisis pa mira si teorétikamente e ta posibel. Despues di esei nan a dura 6 luna pa rediseñá e edifisio na su lokalidat nobo. Un di e 8 mil eksigensianan tabata ku mester a diseñá un hospital paresido di grandura i tipo di organisashon kaba i for di esei a sali e konsepto di e hala largu kaminda tur e kosnan médiko pisá ta manera Kuido Intensivo, Sala di operashon i Poli ta i e 4 pianan. Na Ulanda nan a trahe kontrali esta e pianan ta mustra paden, tur kos interno. Na Ulanda esei ta sosodé pa protehá kontra di friu. Pero na Kòrsou si kier a hasié mester a bòltu e pa tin mas relashon ku pafó posibel. E dushi di den Karibe ta, e bida pafó, ta tur kos ta sosodé pafó, nos bida ta pafó i nos mester a sòru pa tin hopi konekshon ku pafó. E tres elementonan esta, esun largu i e dos bloknan ku kada dos pia a haña nan posishon nobo na Otrobanda. Na Amstel a hasié den 6 siman i na Otrobanda a duna 6 luna. Awor tur hende por mira ku for di e rotònde na Pater Eeuwensweg ta drenta stret den e garashi. Esei no ta un kasualidat pero nan a keda hala e edifisio i na final nos tabata move e edifisio 30 centimeter riba un edifisio di 160 meter largu. Ta komparabel ku un fèlt di futbòl i mitar di largura”, asina Lyongo Juliana a konta Djasabra.

 

Struktura históriko….

Nan a hasi henter un análisis di Otrobanda, kiko ta e struktura, e forma, kon Otrobanda ta hinka den otro, e kaya i e ‘stegen’. Si kana dor di e ‘stegen gebied’ por tuma nota ku nunka bo ta kana règt pasobra e ta bai skùin, pa por sigui stret atrobe. Ta e prinsipio ei a trese den e edifisio di hospital. Ora sali for di Sehos no ta yega stret na e entrada, pero tin di bai drechi i robes pa yega. Meskos ku pa yega e hala A i B kaminda ta dialisá esun kòrá i oraño, eseinan su posishon ta relatá na e liña di awa di ántes. Antes hospital tabata kaba na Rifwater pero e liña di awa ei a sigui pa duna e dos edifisionan nan posishon. Asina ta analisá e struktura históriko i di e morfologia i duna e diferente partinan nan posishon definitivo den e área ei.

 

Saka lo máksimo for di e tereno….

E konstrukshon riba e tereno na Otrobanda tabata un reto pa nan pasobra e espasio tabata unu basta krap pa nan a traha riba dje kompará ku esun di Amstel. Tambe tin di aber ku e diferensia di altura, Colon ta kasi 9 meter riba nivel di laman i Pater Eeuwensweg ta un meter riba nivel di laman. I nan a traha un edifisio ku ta kore di esun bai e otro i e 7 meter di diferensia nan a hinka e parti di parkeo. Si mester a traha e área di parkeo banda di e hospital manera na Amstel lo no tabatin espasio. Ademas e balor di tereno di Otrobanda ta muchu haltu pa traha un área di parkeo den Otrobanda. Ora e balor di tereno subi ta purba hasi dòbel uso di e tereno pa asina saka lo máksimo for di dje.

 

Mesun konsepto….

E diseño di hospital na Otrobanda ta basá riba mesun prinsipio ku esun ku a keda diseñá pa, segun Lyongo Juliana. Tabata e mesun konsepto ku e mesun pianan ku ta tira pafó. Lyongo a bisa Djasabra ku pa realisá un proyekto tin diferente faktor ta hunga un ròl. Importante den un proyekto pa sosiedat ta kiko ta wòrdu kargá dor di e polítika di e momentu ei. Por diskutí si Amstel tabata mihó òf Otrobanda pero importante ta ku un desishon a wòrdu tumá i a sigui riba e desishon ei na e momentu ei. Tur dos tin nan retonan. Lyongo a bisa ku memoria di hende ta kòrtiku pero nan tabata arkitekto ku a diseñá e sentro di operashon di Aqualectra na tereno di Amstel i niun hende tabata ke nada mas na Amstel pasobra e lo a bai bou di awa ku Thomas, loke no ta bèrdat. Pues awor tur hende ta bisa ku si no tabata mihó ku a bai Amstel. Pero ta meskos ku ora nos kumpra un tereno pa traha un kas. E tereno ei ta ideal na e momentu ei, na e fase di bida na e momentu ei i despues di 10 aña kisas bo ta bisa ku si bo tabata sa e tempu ei lo bo a hasi otro. Pero no ta bale la pena sigui diskutí. Amstel tabatin su retonan i un di nan ta ku tabatin kambionan grandi di infrastruktura mester a sosodé einan. Kisas mester a bin un rotònde einan i un hospital mester tin dos kaminda pa yega i mester a traha un brùg pa konektá ku Saliña pa asina subi e tereno di Amstel. Ku esei Lyongo a bisa ku einan tambe nan lo tabatin algun reto pa logr’e e hospital nobo.

 

Ta mi proyekto, mi ta orguyoso….

Lyongo Juliana a bisa ku poko poko e orguyo den loke nan a diseñá ta bin serka dje. No ku e no ta orguyoso; tampoko e ke men ku e edifisio no ta loke e tabata ke pasobra ta su proyekto, pero loke si e por bisa ta ku djabièrnè dia 15 di novèmber tabata un dia emoshonal pe. ‘Henter e wikènt tabata un momentu ku mi a repasá tur e momentunan ku mi a pasa aden 8 aña largu; ta 8 aña di mi bida mi a traha na e hospital aki. I bo ta pasa tur e momentunan alegre, momentunan difísil, momentunan ku bo ta pensa ku bo no ta bai logra, semper mi a keda ku fe den e proyekto. Si tabata un proyekto di un hotèl mi ta kere ku promé ku e 8 aña pasa lo mi a yama danki i bai hasi algu otro, pero e echo ku e ta algu pa sosiedat, esei tabata e motor fuerte pa ami i mi kolega. Nos tabata e úniko antianonan hopi bia na mesa i nos a bringa hopi pa sòru pa Kòrsou haña un hospital ku ta duna e kalidat di edifisio i kalidat di kuido. Loke lo hasi mi mas orguyoso ta ku si pashèntnan ta kontentu i e hendenan ku ta traha einan, ku nan dia di trabou ta bira mas plasentero. Si bo tin di traha den e situashon manera e personal a traha aden, mi ta bisa ‘petje af’ pa nan. Tur dia nan ta lanta i bai traha den e situashon ei, Esei lo yuda den e proseso”, Lyongo Juliana a bisa. Poko poko e orguyo lo krese. “Mi tata a fayesé 13 aña pasá i mi tabata na su kama di malesa i si mira kiko e tabatin di pasa aden komo ku ta 2 left so tin, chemo terapia ta te riba zòlder i un hòmber di edat mester subi un trapi pa bai ariba. I mi a pensa ku mare un dia mi por diseñá un hospital nobo i mi a logr’é”, Lyongo a enfatisá. E ta sumamente kontentu ku e por a aportá; ku e por a duna su parti pa yuda salubridat di Kòrsou dal algun stap dilanti.

 

Traha den klima tropikal ta un balor agregá….

Loke nan komo arkitekto a siña den Karibe, den klima tropikal, ta birando un ‘assett’ ku por usa den Oropa. E zomernan kayente di último 2 aña ta proba ku Ulanda su edifisionan no ta traha pa e situashon ei, segun Lyongo Juliana. I e saber aki, nan por usa na Ulanda tambe. Ta un proseso ku for di dia e tabata studia, el a hasi ku intenshon di traha den Karibe  i su tésis final tabata un proyekto na Kòrsou i St. Eustatius. E arkitektura den Karibe i Kòrsou no a desaroyá den forma natural. Tabatin indjan ku a bin aki, despues spañónan, e ulandes i tabatin periodo di sklabitut ku tabata oprimí e idea ku e hende tabata bin kuné. E proseso no tabata unu natural. I aki pa kopia edifisio di Oropa i Merka i hopi kas na Kòrsou ta manera un fòrnu. Mayoria kas ta mas kayente paden ku pafó mes. Esei ta nifiká ku a faya. A kuminsá traha edifisio pa protehá kontra di influensia di klima. I en bes di solushoná a krea un problema. Ta nifiká ku nos kas no ta bon traha pa nos klima. Lyongo den su estudio tabata buska pa diseñá un edifisio di arkitektura kontemporáneo di Karibe i despues di su tésis final, el a konkluí ku e ta traha arkitektura ku ta kuadra ku e klima karibense. Arkitektura ku ta fasilitá loke e ser humano karibense ke hasi, anto si ta bon esei lo resultá den un arkitektuiraarkitektura Karibense kontemporáneo. Komo ehèmpel el a menshoná ku nos na Kòrsou ta topa otro i kuminsá kombersashon, riba kaya den tráfiko ta kombersá ku otro, ta algu ku na Ulanda no ta hasi. E no ta bon pero e ta parti di nos kultura. I si den edifisio no fasilitá e echo ku por topa otro i start kombersashon sin stroba den kaminda pa otro, e por sosodé i e hende ta sintié na kas. Meskos ku ta bai bishita hende den hospital tin bia ku mas di 10 hende i unda ta pone nan. I p’esei a traha balkonnan grandi kaminda  e hende por warda un ratu, Ta kosnan sensibel  ku ta hasi e diferensia. Esei ta algu ku Lyongo ta propaganda na Ulanda i su tarea ta pa konsientisá riba e parti di diversidat i inklushon. Amsterdam su sosiedat ta konsistí di 46% so di ulandes oropeo i e sobra 54% tin otro ‘background’. I nan sa kiko e ‘amsterdamer’ ke pa su kas. Hopi hende di desendensia surinameño, antiano i islamita i tin komo kustumber di kita sapatu pa drenta kas. Pero e hal di e kas na Ulanda ta asina chikí ku bo no por buk i mara bo feter. Aki ta kuminda otro ku un brasa i esei tampoko ta bai den e hal chikitu ei. E sensibilidat ei Lyongo ta bisa ku no ta pa Kòrsou i Karibe so, pero si tin e, por aplik’é otro kaminda tambe.

 

Desenio mester surpasá moda…..

Papiando di diseñá un edifisio teniendo na kuenta solamente ku moda, Lyongo a bisa Djasabra ku esaki lo bai kai atras lihé pasobra moda ta kambia masha lihé mes. Den su edifisionan por mira kosnan relatá na moda, pero e ta muchu mas ku esei. E diseño mester surpasá moda.

 

Lyongo ta bezig aktualmente ku laboratorio banda di hospital. FKP tambe ta konstruyendo kas ku el a diseñá na Montaña abou. Ta un proyekto inovativo kaminda ta bai traha edifisio di diferente piso pa bibienda i kaminda e mesun aspektonan di klima, kultura a bin dilanti. Nan a purba krea algu ku no tin mester di mira ku ta un kas di FKP. Asina Lyongo tin diferente proyekto mas ku e ta trahando riba dje na Kòrsou i den Karibe. I finalmente el a pidi tur hende pa eksperensiá e hospital nobo, adaptá nan mes na e edifisio, brasa e edifisio i kuid’é, ku aki 10 aña ainda ta mir’é manera ta kaba el a kaba di keda entregá. E parti importante ta pa wak kon e hendenan ta anda ku bo edifisio. P’e semper loke ta importante ku ora e bin bek despues di 5 òf 10 aña kon e edifisio ta. Meskos e ta masha orguyoso ku Hotel ‘t Klooster ku despues di 10 aña ainda por mira  e kalidat ku el a bringa pa trese bèk den e monumento, tei i ta keda apresiá dor di klientenan i a haña asta premio di Monumentenzorg. Esei ta dun’é e energia pa e sigui. ‘Mi trabou no ta matemátika, mi no por bai un kaminda pa mi haña e kontesta, pues kada aseptashon ta importante. Komo mi a logra e biahanan anterior, ta pone ku mi ta hasi esfuerso pa sigui logra”.

SHARE

LEAVE A REPLY