WILLEMSTAD.- Tin hopi reklamo di parti frakshonnan den parlamento riba e maneho finansiero di pais, despues ku a tuma nota di e rapòrt di Kontraloria General (ARC) riba kuenta anual 2022. Kontraloria General no ta duna un deklarashon positivo riba e kuenta anual pasobra a konstatá fayonan legal (“rechtmatigheidsfout”) kaminda gobièrnu a gasta sumanan mionario sin ku esakinan tabata presupuestá i tambe a presupuestá sumanan na entrada ku no a risibí.
Gobièrnu di MFK/PNP a gasta 315 mion florin mas di loke parlamento a akordá pa 2022 i a kobra 207 mion ménos di loke a presupuestá. Diferente partido manera MAN-PIN i KEM a indiká di lo bai studia e rapòrt di Kontraloria General mas den profundidat e wikènt aki pa otro siman nan por reakshoná ofisialmente.
Partido PAR si a saka un komunikado for di ayera bisando ku Kontraloria General a konfirmá loke e partido a bin ta bisa pa basta tempu kaba, esta ku minister Silvania ta manipulá. Segun e partido awor ta komprondé unda e koalishon a saka 14 mion florin pa kumpra Campo Alegre.
Tambe PAR ta mustra ku banda e maneho finansiero iresponsabel aki minister di Finansa, Javier Silvania di forma ilegal a skohe pa eksonerá mas ku 3 miar florin na debe di impuesto. Ku esaki e minister a faboresé bankonan i kompanianan ku tin un volúmen di negoshi mionario.
Kolaboradó di frakshon di partido KEM, Anthony Godett ta bisa ku el a kuminsá analisá sierto sifranan ku ta bin dilanti kaba. Un di e gastunan ku na promé instante a hala su atenshon ta 30 mion èkstra riba “gewone dienst” di Ministerio di BPD. Godett ta bisa ku esaki ta un di e puntonan ku gobièrnu mester bai duna aklarashon riba dje.
Otro frakshonnan ta indiká ku e loke Kontraloria General ta konstatá ta kuadra ku loke Kolegio Supervishon Finansiero (Cft)tambe a señalá na vários okashon, esta ku maneho finansiero di gobièrnu no ta bon.
Cft ta mustra entre otro ku posishon di likides di gobièrnu ta ménos positivo for di loke tin pone den presupuesto. Tambe ta mustra ku entradanan di pais ta keda atras riba loke ta presupuestá.
Pa loke ta e riesgonan finansiero Cft pa basta tempu kaba ta pidi pa definí riesgonan manera Curaçao Medical Center, Ennia i fondonan sosial mas mihó den presupuesto. Cft pa e motibu aki ta urgi minister Silvania pa promé ku 31 mei awor entregá na parlamento un konsepto di presupuesto 2024 nobo ku ta mas realístiko i ta kontené tur e riesgonan finansiero.
Mas di e preguntanan ku frakshonnan den parlamento tin a base di e e rapòrt di Kontraloria General ta si esaki ta motibu ku no ta yega na akuerdo pa kaba riba eliminashon di e lei pa kòrta di kondishon laboral di ámtenarnan ku 12,5 porshento. Pasobra no tin sèn pa paga indeksashon di salario, “loontrede” i lumpsum 2023.
