Entrevista ku Mr. Dayanara Chin-A-Lien Roozendal, eks minister SOAW
WILLEMSTAD.-Despues di kiebro entre partidonan MFK i PNP na 2024, partido KEM a duna sosten na e gabinete Pisas II. EXTRA a hiba un kombersashon ku Mr. Dayanara Chin-A-Lien Roozendal algun dia despues ku el a baha komo minister. El a splika ku e sektor di labor tabata unu ku a gara su atenshon. Tin hopi lei bieu pero esei no ta nifiká ku mester bai tras di esnan ku ta grita mas duru.
Kòrsou tin un gobièrnu nobo, despues di elekshon di 21 mart 2025. A puntra sra. Roozendal kon a bai i el a bisa ku a bai hopi bon i asta mas mihó ku mi mes a kere. Riba e pregunta di EXTRA si e fam Roozendal a yud’é komo minister el a splika ku énfasis ku e no ta pertenesé na e famia di kua e pronunsiashon di e fam ta zona meskos. Niun hende den su famia a yega di ta den polítika.
Pa loke ta trata e ministerio di Desaroyo Sosial, Bienestar i Labor e eks minister a bisa ku promé ku el a bira minister el a funshoná komo direktor di maneho na SOAW. Tambe e a fungi komo Sekretario General (SG) di e ministerio. For di e momentu ei el a hañ’é den un situashon kaminda e konstelashon den gobièrnu a kambia, pues direpente den ‘laman brutu’. Partido KEM a drenta na ougùstùs, sèptèmber 2024. E echo ku e kambio a tuma lugá sin traspaso (overdracht) tabata un situashon difísil.
EXTRA a puntra kua tabata e puntonan prinsipal ku a eksigí mas atenshon. Sra. Roozendal a bisa ku mester a hasi análisis kiko tin pa logra resultado den e lunanan ku falta, di e periodo di gobernashon. A hasi evaluashon i mesora a realisá ku tin e ámtenarnan. E empleadonan tambe mester a kustumbrá ku e minister nobo, loke ta lógiko. Pero komo mandatario el a mustra konfiansa i rèspèt pa nan trabou i asina a gana konfiansa serka e empleadonan.
Mas aleu sra. Roozendal a bisa ku pa Partido KEM e énfasis ta pa e hende ku tin mas mester di yudansa pa e por yega na un bibá mas mihó. SOAW sigur ta e ministerio ku ta pone atenshon riba e parti humano di pueblo.
EXTRA a insistí pa tende kua parti di SOAW a eksigí mas atenshon. Dayanara Roozendal a splika ku den promé instante e parti di bienestar a resaltá. Atenshon di e fundadó di KEM sigur ta riba kas pa pueblo. Pa tur hende tin un bibá na drechi. Pero segun a drenta mas den e ministerio a bin nota ku tin otro área ku tambe ta importante. ‘Ami komo hurista a bai mas profundo huntu ku otro koleganan hurista, i a analisá mas e sektor di labor. E tabata mi beibi, paso empresarionan ta reklamá ku nan pèrmitnan no ta sali mesun lihé ku den pasado.
Sektor empresarial tin doló di kabes, tin kresementu, pero no ta haña hende pa traha apesar ku e lista di hende ku ta buskando trabou ta asina largu.”
El a splika ‘mi prinsipio ta komo gobernante bo no por wak bienestar di un grupo so, komo gobernante bo ta obligá di wak e interes kolektivo pues di esun ku ta buska trabou i di e empresario ku tin mester di trahadó. E empresario no ta ménos importante, pasobra su negoshi mester bai bon pa e krea trabou pa nos hendenan haña trabou.”
Mas aleu el a deklará tambe ku den un demokrasia mester tende e minoria tambe i no solamente e mayoria òf esun ku tin sèn. Na momentu ku e pais bai bon ta bon pa e bai bon pa tur i no pa un grupo so. Anto hopi importante ta pa sigui regla. ‘Komo wetgevingsjurist Dayanara ta konsiente ku hopi di nos leinan ta bieu. Tin lei ku ta data di 1931, pues e ta konsiente di esei. Pero nos ta biba den un estado di derecho, pues si e lei ta bieu mester buska manera pa hasi e kambio. No por ta asina si ku ta bai tras di esun ku ta grita mas duru pa komplasé.
Den kaso di turismo esei ta kresiendo. Mester investigá kuantu tempu turismo ta keda krese. Ta papia di ke importá entre 4000 – 6000 hende, pero kiko ta pasa ora turismo no sigui krese?
Pa loke ta trata e parti di Bienestar, EXTRA a puntra si e ministerio ta komprondé ku bienestar ta nifiká wak kon pa yuda e hende den nesesidat.
Roozendal ta bisa ku el a purba di ta aksesibel pa klientenan i tambe pa koleganan den ministerio pa sinti loke ta pasando. REXTRA a puntra kon realístiko e ta den e situashon aktual di Kòrsou, kaminda tin hende ke subi suèldu i otro gastunan. Kon realístiko esaki ta?
‘Tin un realidat ku e ministerio tin 6 mil hende ta kobra ònderstant. Mester hasi análisis. Falta di kontrol ta un debilidat sigur, pero mester investigá pa sa e realidat. Tin hopi nesesidat di trahadó, pero e minister tabata wanta pèrmitnan. ‘Mi no a wanta niun pèrmit. Asta a atendé atraso. Pèrmit ta keda ningá pasobra e petishon no ta kumpli ku rekisitonan i p’esei no por duna pèrmit.”
Tin un rapòrt ku a sali nèt ora Dayanara Roozendal a baha, pues tin un rapòrt ku mester duna klaridat riba situashonnan den SOAW. Roozendal lo ke bolbe asumí e trabou komo minister den futuro?
Por sigui e entrevista kompletu riba e plataforma digital di EXTRA, sea Facebook, EXTRA YouTube, www.extra.cw etc
Ta lansa e entrevista djasabra 21 yüni 6’or atardi.
