WILLEMSTAD.- Hopi ta e menornan di edat ku tin ku presentá dilanti hues den e próksimo kasonan di infrakshon di tráfiko. Fiskal a splika ku ta trata di menornan ku a keda gará bou di stür, pero ku ainda no tin ni e edat pa saka reibeweis.
E menornan ta obligá pa presentá ku nan mayornan pa asina hues atendé ku e mayornan. Den hopi kaso hues ta splika e menor ku ta kompletamente iresponsabel pa kore outo sin un reibeweis pa motibu ku esaki por tin konsekuensia serio tantu pa e, komo su mayornan.
Mayoria kaso e mayornan tabata na altura ku e yu ta kore outo i hopi bes nan mes ta atmití di ta laga e menor kore pa vários motibu. Hues a splika ku no tin esküs pa laga un menor kore outo òf sin reibeweis. P’esei hues hopi bia ta tuma e mayor hopi na malu si konsientemente e ta laga e menor kore outo sin reibeweis.
Tambe tin kasonan ku e mayor no sa mes ku e yu a kue e vehíkulo bai kuné. Pa e próksimo kaso di infrakshon di tráfiko, hopi menor tin ku bin responsabilisá nan mes serka hues pa korementu di vehíkulo sin pèrmit ofisial.
