Hopi muhé ku kapasidat lo no logra nada nunka

Dianan 30 i 31 di mei próksimo lo bai tin e di 17 konferensia anual di Liderazgo Femenino na Kòrsou “Stories of Female Leaders. Hendenan muhé lidernan inspiradó, ta trese nan historia na otronan. Reyna Joe inisiadó i organisadó di e evento aki ta konta nos e idea tras di e konferensia aki, ku un biaha mas ta primintí di bira grandioso ku oradornan lokal i internashonal.

Diploma no ke men nada….

For di 2004 e konferensia a kuminsá i a dura te awe, 17 aña konsekutivo. E konferensia, manera Reyna a bisa nos di Djasabra, ta sali for di un vishon. E vishon ta ku rònt mundu tin miónes di dòler ta bai pa yuda hende muhé pasobra hende muhé ta kai den kategoria spesial. “Mi no sa ku tur bia nos mester ta kontentu ku esei pero e realidat ta ku hopi bia hende muhé no tin e igualdat ku hende hòmber tin den tur sentido. Tin hopi plaka ta bai dor di organisashonnan internashonal i ku ke hasi obra di karidat pa hende muhé. E no ta bai pa hende muhé manera nos, pero pa hende muhé patétiko. E hende muhé ku bo mester tin duele di dje, loke no ta realista mas. Tin e hende muhé ku ta sali for di kas, pober, ku kondishonnan sosial teribel, situashonnan di abuso, pero tin tambe e muhé fortifiká ku a haña oportunidat pa siña, oportunidat pa hasi karera, oportunidat pa bida di kalidat. Na momentu ku bo sali for di e situashon patétiko, tur hende ta hala man for di bo. Bo no ta interesante mas, no ta yuda bu ku nada mas”, segun Reyna Joe. I esaki tin bia ta mara na klase tambe. Si e hende muhé ku a sali for di e situashon ku netamente a hinka sèn den dje pe sali afó, ora e sali afó e no ta un hèrmènt di bida, e no tin e hèrmènt di kon komportá su mes den sierto situashonnan, e no tin e táktikanan diplomátiko. Un diploma no ke men nada, un diploma no nifiká ku bo por a siña bon, un diploma por bira un bon hèrmènt den bo bida pero no ta hasi bu e lider femenino.

 

Partikular no tin mesun chèns….

Si wak Kòrsou, e hende muhé ta haña e papel, un posishon, pero si bo haña un trabou den gobièrnu bo ta mas safe ku esun ku a haña trabou den sektor partikular. Den gobièrnu tin kondishonnan i leinan. Si bai traha partikular hopi bia bo no ta haña mesun chèns ku otronan por ehèmpel den gobièrnu. Sinembargo Reyna Joe ta haña ku unda ku e hende muhé bai traha e mester di e hèrmènt pa desaroyá su mes i esei ta e vishon ku hopi bia falta.

Reyna Joe a sigui bisa ku a bira mas ku normal ku hende muhé eduká ta kai den situashon ku nan ta frustra, nan ta malkontentu ku loke nan tin, nan ta den desapunto. No mester di estadistika, pero pensa kuantu hende muhé studiá i profeshonal por mira realmente den komunidat. I pió ainda el a bisa ku tin trampanan ku no ta bisa e hende muhé di dje for di kuminsamentu.

 

Trampanan….

Reyna Joe a papia di e trampanan ku no ta papia di dje for di kuminsamentu;

E promé trampa ta ku nan ta haña yu. Ora haña yu e ta un di e trampanan pa hasi un karera profeshonal. Of e ta deskuidá e yu, òf e ta hasi karera. I Reyna Joe ta bisa e hende muhé pa e wak ku e ta bon ku madrina, pepe, tanta, amiga i tur hende. Pa nan yuda wak e yu den un ambiente protehá pa e muhé por ta trankil trahando.  Reyna a bisa ku mester hasi un investigashon riba muchanan ku a bai kuido pagá i e muchanan ku a keda den kuido na kas i privá. E no ke duna opinion pero mester hasi un investigashon riba dje. Pasobra ora e trampa ei bin, i  muhé haña yu, su doño di trabou ku probablemente ta un hende hòmber lo kuminsá reklamá ku e muhé lo bai keda kas pasobra tin di wak yu. Hopi hende muhé ku yu no ta haña trabou fásil, si no ta den e strukturanan safe reglá. Reyna ta kòrda ku el a laga un trahadó di dje hende muhé ku yu, bin trabou ku e yu, pero e no a programá e yu. E yu ta mishi i benta kos abou miéntras e sa kon el a kria su yunan ku no ta hasi e kosnan ei. E ta bedei e yu promé ku nan sali bai un kaminda ta unda nan ta bai i kiko ta spera di e yu. Esei e ta hasi asta ku su nietu awor. Mester programá un mucha, Un mucha no ta sali kla kaba ku su bachi i studiá. E mucha ta sali un mònster i abo tin di moldi’é i esei tambe ta kai bou di liderazgo femenino. E muhé ku yu mester sa kon ta programá su yu pa e sirbié despues den bida. Mucha mester sinta ketu i mester siñ’é for di chikí. Tin hende no ta gusta mucha i si nan tin e sensashon ei ku bo yu, e lo bai ta negativo pa e mama tambe. No por bisa un mama bin trabou ku su yu si e no a program’é.

 

E muhé mas studiá ku e hòmber….

Un otro trampa ta ku hopi muhé den un relashon sea kasá òf bibá, hopi bia e partner òf kasá no ta komprondé ku e muhé por tin trabou mas importante kuné. I esei ta un otro trampa pasobra en bes di gasta energia na kosnan produktivo i ser mas kreativo, bo ta gast’é pa manehá un hòmber òf purba sikiera pa reprogram’é pa e komprondé bu.

 

Hende muhé ta su mes trampa….

E di tres trampa ta hende muhé mes. Hopi hende muhé no ta sostené hende muhé ku ta taha. Si ta hende ku a studia i haña diploma i yega nivel mas abou, esnan mas abou no ta gusta bu. E ta kere esei ta ignoransia. Nan no sa mihó i no ta komprondé kiko ta un muhé den un bon posishon. Reyna ta kòrda ku dia su yu hòmber a bai universidat pa promé bia, nan tabata 15 studiante den klas i 2 mucha hòmber. Ta interesante pa sa kon nan ta kaba den bida i si e hende muhé a haña chèns realmente. El a ripará ku e hende hòmber ku tabata bati 6 i 7 tin chèns grandi ku ta bira shèf di e mucha muhé ku tabata bati 10 so. Esei ta realidat. Si nos no komprondé esei, nos ta keda atendé ku hende muhé na nivel di hende muhé den situashon sosial retá, ku ta den situashon mas abou, den situashon di abusu i tur e kosnan ku ta hasi su situashon patétiko. E hende muhé ku a logra, pasobra ta un esfuerso, bai skol ta un esfuerso i a logra dado momentu e tambe mester di sosten pa e keda kaminda e ta.

 

Surpasá tur kos….

Kada konferensia di liderazgo femenino ta laga e partisipante sali yen. E ta un dushi sentimentu, un kos ku ta surpasá tur kos. E ta un situashon kaminda bo ta haña un ambiente na bo nivel. I e konferensia aki no ta deskriminá niun hende. Reyna mes ta un hende ku ta bai tur konferensia. E ta bai nan pasobra si e ta hasi algu e mester sa kiko otro ta hasi. E no ta bisa ku e no ta bai pasobra e ke bai pa wak kiko ta pasa. E konferensia di liderazgo aki ta unu di Red Carpet. E partisipante ku tei lo sintié bon, lugá nèchi, bon kuminda, esei ta e idea. E muhé meresé lo mehor. E echo ku e muhé a studia i yega na un nivel e mester sintié bèk ora ta trat’é.

E muhé sa ku e tin retonan ku otro hende no tin

Konfushon den bida….

Reyna Joe mas aleu a bisa ku e ta kere ku tin hopi konfushon den bida, pero esei ta debí na e tempu ku nos ta bibando aden. E hende muhé ku a lanta programá ku e no bal nada, e no meresé e posishon ku e ta, kisas su alma ta kere. I si bo alma kere bo ta komportá bu segun bo ta kere den bo mes. E ta kere ku no por husga pa un hende su bida, pero e tin sigur ku hopi hende muhé ku a haña chèns no ta realisá ku ta chèns nan a haña. Nan ta kere ku ta normal.  Kòrsou ta un pais eksepshonal i por mira aki hopi muhé den posishonnan klave spesialmente den gobièrnu. Tempu Reyna tabata bai skol ta un kos e tabata sa, esta ku e tin di bai skol i siña. No tabatin eskoho. Ta skol mester a bai i niun hende ta preokupá kon e ta hasié, pero e tin di bai skol. Meskos ku tin sierto kultura no ke pa e yu muhé ni bai skol. Esei ta un kaso ku Reyna tin awor aki ta atendé. E ta hasi hopi trabou pa yuda hende muhé i énfasis riba hende muhé hóben. Huntu ku su amiga nan ta hasi hopi trabou.

 

Ku kapasidat pero sin por logra….

Reyna Joe tin 31 aña ku negoshi i masha hopi hende muhé a traha pe. Kada bes e ta sorprendí kon hende muhé ke tene nan mes atras. E ta duna komo ehèmpel un hende muhé ku ta bin traha serka dje i 5 or ora su pareha a bin busk’é, e no tabata kla ainda ku trabou.  E hòmber ta kuminsá zundra i bisa pa laga e muhé (doño di trabou) trese e kasá kas anto. Ta ku ki smak e muhé ei ta bai traha. Nos tin un kaminda largu pa bai, Hopi muhé ku kapasidat lo no logra nada nunka. No pasobra Reyna no ke nan bon, pasobra e ke nan tur bon. E muhé mes mester wak su mes, balorá su mes na otro manera. Hopi hende muhé ta aseptá ku ta hasi kos pa hende muhé dia 8 di mart, duna flor i chukulati i zundra nan manisé. E kos ei no ta normal. “Mi no ke flor ni chukulati, pero mi ke rèspèt”. Ta bèrgwensa ku tin dia di hende muhé, ounke mester bisa ku mester di dje si. Tin situashonnan hopi difísil i hopi reto pa e muhé. Pero ta bèrgwensa ku mester di un dia asina ei pa hende muhé. Nos hende muhé mester komprondé e kos ei. Tin hende muhé no a studia pero a krese den un trabou i hasi un bon karera, e muhé ku a yega ei e mester komprondé.

 

Kustumber ta mal kos….

Sierto hende muhé a keda pegá un kaminda. Reyna Joe a bisa ku e ta masha kla i no ta husga pasobra e no sa ki kaminda e hende a pasa pa kaminda e ta. Pero sin ta husga e tin miedu di e hende komo ehèmpel. No por laga tur hende bin bo kas pasobra bo yunan ta wak e hendenan. E mucha ku no por husga ta pensa ku e hende ei ta oké. E hende por ta bin bo lugá i si e no tin sierto kos pa su mes bou di kontròl, e no por ta un ehèmpel tampoko. Tempu Reyna tabata hóben e tabata modelá i den yen kos di beyesa, na e edat awor e sa ku no ta esei ta bida. I si komprondé e kos ei bo ta ripará ku hopi bia e kosnan ei ta pa despistá bu i kita bo focus for di kosnan mas real den bida. Awor aki ku e situashon ku chèns ta grandi ku hopi kos ta kambia, hopi hende lo no por atendé mas ku nan mes. Hopi hende lo no sa mas kiko pa hasi pasobra nan no a kustumbrá asina. Kustumber ta mal kos, ora bo ta kómodo ta malu, bo mester ta den situashon ku bo por yuda bo kurpa.

 

Amiga ta importante den bida….

Nos komo hende muhé ta esnan ku tin di dirigí kos. Bo no por dirigí kos si bo no ta na tempu i konfundí. I loke ta importante ta amiga. Un hende mester di amiga ku ta bisa bu un kos den bo kara. Amiga na tinu ku ta bisa manera e kos i no ta bin bisa bu di e ‘lashes’ ku bo tin di pone pasobra e mes no a wak su mes den spil. Bo no por ta ehèmpel ni ‘role model’ si bo no ta kla ku bo mes. I esei no ta hasi bu mas spesial ku niun hende, e no ta hasi bu mihó ku niun hende. Esei ta básikamente e esfuerso ta bai hinka pa logra e konferensia di liderazgo pa hende muhé.

Hende muhé lider….

E konferensia di e aña aki ta tópiko di hende muhé pa otro, 6 hende muhé ta bai konta nan historia. Nan ku  diferente ángulo. Kada un ta un ‘role model’. Kada un ta un lider di nan nivel i kada un tin kos di konta. Tin un ta yùfrou di skol i for di tempu ku Reyna konosé, tur bia e tin algu eksitante ku a pasa den su trabou. Tur bia tin algu ku ta bisa ku ta bale la pena pa e hende aki ta eksistí i sirbi manera e ta sirbi. Tin for di Merka un señora ku a pasa den situashon di abuzu ku e tabata kasá ku un hòmber importante i tur kaminda e hòmber ta kana kuné pero e ku su brel grandi bistí pasobra e hòmber a kaba di batié. Awor e tin un grupo di hende muhé na Merka masha great i sin miedu. Kada bes ku papia kuné bo ta keda yen. Esaki ta tópiko di sobrebibensia. E otro ta un señora na Colombia. E tambe tin hende muhé, muhénan integral i e tambe ta hasi hopi kos pa e hende muhé keda para i no sak pero stret den bida. Tin un dama empresario di Kòrsou masha impreshonante. Tur a pasa algu den bida ku a pone ku nan por komprondé dikon nan por ta e mihó di nan mes. Nan mester ta mihó ku mihó pa nan mes i no pa mundu. Hopi hende ta wak mundu pero wak bo mes. Ora bo deskubrí bo mes tur kos ta pasa. Si bo ta bon bo ta bon pa tur hende. Si bo no ta bon bo no ta bin ni pa bo ni pa niun hende.

 

Riba facebook ta aboutfemaleleadership i énfasis internashonal. I un e-mail ku tambe ta aboutfemaleleadership@gmail.com. I esaki ta pa tur hende ku ke sa mas di e konferensia i ta interesá pa forma parti di dje.

 

 

Feng Shui un hèrmènt den mi bida….

Reyna Joe ta gusta e bida den naturalesa. El a bisa ku e no por sinta sera den un lugá. E ta orador internashonal basta regular i un bia pa aña sigur e ta bai papia den eksterior. E ta  mama i wela pasobra e ta gusta esei. E ta algu dushi den su bida. E ta gusta naturalesa, su kolekshon di orkidia. I un di e kosnan ku e tin 23 aña ta hasi na Feng Shui. El a sertifiká komo Feng Shui master i ta ‘praktishonista’ serka Lillian Too na Malesia. Reyna ta sigur ku esei a yud’é hopi den bida. Tur hende ta pasa reto den bida i un di e hèrmèntnan ku e ta usa ta e konosementu antiguo di Feng Shui. No ta un religion pero filosofia den bida. Dia el a konosé na 1997 el a rabia pasobra niun hende no a yega di kont’é di dje. Mas e profundisá den dje, e ta konkluí ku nos por yuda nos kurpa ku e konosementu aki. Nos mester por buska mas kos pa nos por ta mihó pa nos mes. I e tin esaki komo un hèrmènt.

 

 

SHARE

LEAVE A REPLY