PARIS, Fransia (AFP).- Na momento ku e direktor Reinaldo Marcus Green a disidí pa traha riba un pelíkula riba e rei di reggae, Bob Marley, e peso di responsabilidat tabata enorme. Esei mas ainda pa motibu ku e estreno mester ta na Jamaica.

“E responsabilidat tabata asina grandi ku m’a pensa ku ta un lokura pa hinka mi mes den e kos ei”, segun Green a splika na AFP.

“Hamaikinonan ta duru, nan estilo: No mishi ku Bob!… pero afortunadamente nan a duna nos oké”, segun el a indiká. “Tabata un gran alivio”, Green a duna di konosé.

“ Bob Marley: One Love”, ku otro siman lo keda estrená rònt mundu, tabata un proyekto solamente pa esnan balente.

Olivier Stone a frakasá den su intento pa filma e promé biografia dje mito di reggae, kende a muri di kanser na edat di 36 aña, ora ku e tabata den tòp di fama.

I den kaso di Reinaldo Marcus Green, e direktor norteamerikano tabatin solamente un par di produkshon grandi den su poder: King Richard (2021) den kua Will Smith ta interpretá e tata dje streanan di tènis Venus i Serena Williams i “Joe Bell” (2020), un historia di Mark Wahlberg.

E pelíkula a keda ko-produsí pa su biuda Rita Marley i su yunan Ziggy i Cella, komo tambe Brad Pitt. Tabata e propio Ziggy ku a aprobá elekshon dje aktor britániko Kingsley Ben-Adir pa interpretá papel di su tata.

E pelíkula ta kubri e periodo entre 1976 i 1978, ora ku Marley a lansa su albùm “Exodus” ku a hasi di dje un strea mundial, pero tambe el a sufri un intento di asesinato i a deskubrí ku kanser hopi lihé lo kaba ku su bida.

Ben-Adir a siña kanta pa e papel i su bos a keda mesklá ku grabashonnan di Marley durante dje pelíkula.

E pelíkula ta mustra tur aspekto di Marley, kende tabatin un reputashon di karakter fuerte den su famia i serka amigunan, kompetitivo i poko inhumano, pero tambe trankil i inosente, manera un mucha chikitu, segun Ben-Adir a bisa.

E esenanan a rekerí hopi trabou privá ku su famia. ”Mi tin hopi rèspèt pa nan balentia di a kompartí e partinan ei ku nos”, di akuerdo ku Ben-Adir.

LAGA UN KOMENTARIO

Please enter your comment!
Please enter your name here