Hopi doloroso mira pashènt muri sin niun famia aserka

WILLEMSTAD.-Curaçao Medical Center (CMC) un bia mas trese e seriedat di e situashon di e hospital den kuadro di Covid. Gerensia di CMC di forma hopi kla a mustra kon dramátiko e situashon a bira di un tempu hopi kòrtiku. ‘Corona ta kibra tur kos, e ta kibra kurason, e ta kibra famia i ta kibra tur kos.

Tin mester di 4 pa 5 profeshonal na kada kama pa yuda e pashènt ku ta sufri na momentu ku e no por hala rosea. Pashèntnan ta muri sin nan famia rondó di nan, loke ta hopi doloroso. P’esei e petishon ta pa keda kas, no bai den aglomerashon”, na palabra dr. Merkies.

Gilbert Martina direktor di CMC a bisa ku e gastu di oksígeno ta unu di e gastunan di hospital ku a subi drástikamente. E gastu di oksígeno so a subi 10x debí na Covid. A papia pa bai hasi uso di Hospital Sint. Elisabeth i pa esaki CMC a tende ku gobièrnu lo bai pone fondonan disponibel pa kubri e gastunan operashonal di Sehos pasobra CMC no tin esei den su presupuesto.

Na e momentunan aki tin alrededor di 100 persona ku Covid den hospital CMC. E loke tin na pashèntnan di Covid den CMC ta konsekuensia di e situashon pafó. Si den prinsipio ta hende grandi tabata muri, awor por mira ku mas hende yòn ta muri. Ta bon pa realisá ku tin hende yòn ku ta muri sin ku nan tin problema ku suku, preshon i otro malesanan króniko. Merkies a konta kon tristu tabata di mira kon un wela ta mira su yu muri lagando su muchanan atras. Otro kaso tristu tabata kon un hende a bini for di Ulanda ku un PCR-test negativo i a brasa su mayornan. Algun dia despues e mester a dera un di su mayornan ku a pega ku Covid. E kantidat di kasonan di Covid den CMC a triplifika. Un djis aki lo no tin sufisiente trahadó pa atendé e kantidat di pashèntnan.

E petishon ta na komunidat pa keda kas, no bai den aglomerashon, no bai fiesta i enkuentronan skondí pasobra e daño ta na bo famia i na hinter komunidat. Ta bon pa kada hende realisá ku ora un hende tuma e bakuna e ta yuda e mes i tur esnan rondó di dje. E fin di siman aki hotèlnan lo ta yen, ke men mester spera ku lo tin mas hende ku ta bira malu. Kuida! Mas detaye den edishon di EXTRA.

 

LAGA UN KOMENTARIO

Please enter your comment!
Please enter your name here