Mas daño severo riba na edifisionan den zùit di Beirut, kaminda Israel den fin di siman a konsentrá su atakenan.
TEHRAN, Iran (AFP).- Israel ayera a realisá atakenan nobo riba barionan den zùit di Beirut, konsiderá komo área dominá pa e grupo pro iraní Hezbola, ku a laga dos morto. Nan a hasi esaki komo represaya ku tirunan den teritorio israelí miéntras ku e siglo di violensia ta sigui. E atakenan israelí a laga dos morto i 20 herido, entre nan kuater mucha i kuater hende muhé, segun Ministerio di Salú libanes.
Di su parti, Israel a reklamá atakenan iraní ku ‘drones’ kontra su teritorio, ku ta e proménan for di despues ku dia 8 di aprel a yega na un akuerdo pa stòp di ataká otro. Tehran, ku a saka un komunikado bisando ku Israel “a krusa tur liña kòrá” den Líbano, un ratu promé a menasá ku represaya kontra interesnan norteamerikano i israelí den Medio Oriente. E posibilidat pa yega na un akuerdo pa pone fin na e guera ku a start 100 dia pasá i ku a pone ku ekonomia mundial a tambaliá, kada bes ta mas leu.
“E blokeo naval imponé pa Iran i e lus bèrdè duná ayera di parti di Merka na e régimen zionisa ta konbertí e basenan i propiedatnan norteamerikano dje régimen israelí komo ophetivonan legítimo, segun e negoshadó prinsipal di Iran i presidente di Parlamento, Mohamad Baqer Qalibaf. “Nos forsanan armá, manera semper, tin libertat pa aktual”, segun el a agregá.
Kuminsando luna di mart, e atakenan kontra Líbano a laga por lo ménos 3.613 morto, segun e último balansa di outoridatnan. Di parti di Israel, 29 sòldá i un kontratista sivil a pèrdè na bida, segun ehérsito.
Iran ta eksigí pa kualke akuerdo ku Merka inkluí e fin dje hostilidatnan den teritorio líbanes, miéntras ku Washington ta preferá pa trata kada tema apart. Den e konteksto ei, Trump a insistí serka su aliado israelí pa e atakenan kontra di Hezbola ta hopi mas presis.
