E lokual a sobra di parti dilanti di Viva Dominicus Beach Hotel na Bayahi, provinsia La Altagracia na Rep. Dominikana.
SANTO DOMINGO (AFP).- Alrededor di 1.700 turista evakuá dje hotèl Viva Dominicus Beach, na e siudat dominikano Bayahibe, ayera a kuminsá regresá nan pais despues di a pèrdè tur kos den un kandela ku a destruí nan hotèl. E kandela, ku a kosta bida di un turista italiano, a laga e turistanan sin ningun dokumento ofisial.
Gran parti dje hotèl a kima práktikamente kompletu i a laga e mayoria dje turistanan ku solamente nan trahe di baño òf karson kòrtiku. “Tabata algu tremendo, nos a pasa algun dia masha bunita pa despues e kos aki tuma lugá. Tur nos kosnan ta den hotèl i nan no ta laga nos drenta”, segun Agustina Torre, un turista argentino den trahe di baño. Esun ku a fayesé ta e italiano Francesca Valentino.
E kansier Antonio Tajani a tuma kontakto ku su kasá pa ofresé kondolensia di parti di gobièrnu italiano. E turista huntu ku su kasá a keda trasladá pa hòspital, kaminda el a fayesé pa motibu di a inhalá hopi huma.
Djasabra anochi un buelo a lanta i 80 italiano mas a regresá djadumingu. Otro 90 lo regresá nan pais den próksimo dianan. Outoridatnan kompetente ayera tabata asistí mas ku 100 siudadano argentino kendenan a pèrdè tur dokumento i pertenensianan personal.
Prensa dominikano a informá ku e kandela a afektá tambe un grupo di 97 turista franses, kende tambe a pèrdè tur kos.
Carlos Rodriguez, un trahadó dje motèl, a bisa na AFP ku e kandela a kuminsá na resèpsi. “E struktura di palu di bambu praktikamente ta un kombustibel natural i e kandela a plama masha lihé. Realmente un tragedia ku ningun ser humano ke biba” segun el a duna di konosé.
Turismo ta e aktividat ekonómiko prinsipal di Rep. Dominikana, ku den 2025 a risibí kasi 12 mion turista.
