WASHINGTON, MERKA, AFP.- E organisashon No Gubernamental Human Rights Watch (HRW) a bisa ku e gobièrnu interino di Jeanine Añez ta usa e sistema di Hustisia di Bolivia pa persiguí kolaboradornan i partidarionan di eks presidente Evo Morales, algu ku e ehekutivo di La Paz ta rechasá.
E organisashon a indiká ku vários denunsia i akusashon ta infundá òf desproporshonal, ku diferente violashon i uso eksesivo i arbitrario di e detenshon preventivo.
E gobièrnu di Añez a rechasá e denunsianan di persekushon polítiko kategorikamente.
E elekshon di kasi un aña pasá a keda anulá despues ku Organisashon di Estadonan di Amérika (OEA) a establesé ku e votamentu a wòrdu manipulá na fabor di e eks mandatario, kende a renunsiá despues di un ola di protesta i preshon di forsa armá di e pais.
Morales a buska asilo na México inisialmente, pero e ta bibando na Argentina. E gobièrnu di Bolivia ta akusá ku terorismo.
HRW a bisa ku e akusashonnan kontra Morales ta basá riba un yamada den novèmber 2019, algun dia despues ku Morales a renunsiá. Den e yamada por skucha Morales pidiendo un kolaboradó pa organisá manifestashonnan i blòkia kareteranan den Bolivia.
