WILLEMSTAD.- Ayera hues a hasi un análisis di aseptashon di homoseksual den nos komunidat. El a hasi esaki den un sentensia ku dos dama i Human Rights Caribbean Foundation kontra di gobièrnu pa kasamentu di mesun sekso òf registrashon di e kasamentu aki di forma legal den nos Buki Sivil di lei.

Di akuerdo ku hues, e dos damanan aki tin un relashon di afekshon ku otro i ta biba ku otro pa 10 aña kaba. Nan kier kasa, pero Buki di Lei di Kòrsou ta rekonosé matrimonio solamente entre hòmber i muhé. Segun e  damanan esaki ta kontra di nos Areglo di Estado, prinsipio di igualdat i prohibishon di deskriminashon.

E damanan a mustra ku artíkulonan sientífiko ku orientashon homoseksual ta un kuestion ku ta keda definí pa karakter i ta algu biológiko.

Gobièrnu di su banda ta bisa ku ainda siensia no a definí esaki, i ku no ta ekskluyé e posibilidat ku homoseksualidat ta un eskoho. Hues ta haña e ponensia di gobièrnu no ta sufisientemente motivá. P’esei hues ta sali for di e punto di bista ku orientashon seksual di un hende pa gran parti ta un karakterístika di dje i esaki ta konta pa hende ku ta gusta persona di mesun sekso tambe. Pues e ta kuestion biológiko i no un eskoho.

E damanan a kalkulá ku na Kòrsou 10% di e poblashon ta homoseksual kual ta 16 mil hende. Gobièrnu ta bisa ku no tin ningun sifra di esaki ni tampoko investigashon. Ademas esaki no ta importante den e kaso aki.

Echo ta ku un gran parti di siudadano di Kòrsou ta homoseksual. Relashonnan di afekshon i bibamentu huntu di partner nan di mesun sekso tambe ta un realidat di e komunidat aki.

Mas aleu gobièrnu ta bisa ku un mayoria di poblashon di Kòrsou ta haña ku si habri matrimonio di mesun sekso ku esaki ta kontra di nan religion. Di akuerdo ku hues, for di rapòrt di Centraal Bureau voor de Statistiek, ta mustra ku religion tin un ròl i poseshon importante den komunidat di Kòrsou. E rapòrt ta basá riba un investigashon ku a hasi na 2015. Den e enkuesta aki, 35,5% di esnan ku a entrevista ta bai misa, moské, sinagoga òf tèmpel tur siman. No por saka konklushon for di e sifranan aki ku introdukshon di matrimonio di mesun sekso òf registrashon di partner di mesun sekso ta en kontra di religion.

E mesun rapòrt di CBS ta duna un bista di aseptashon di personanan homoseksual na Kòrsou. Alrededor di 75% di esnan entrevista no tin problema ku un pareha homoseksual ta biba banda di nan kas. Solamente 20% a bisa nan no ke i 5% a bisa nan no sa. 70% di esnan entrevista ta di akuerdo ku homoseksualnan mester haña trato igual.

No tin nada mas pa indiká ku aseptashon di homoseksual den nos komunidat for di 2015 a baha. Al kontrario tin indikashon ku tin un oumento di aseptashon.

Hues a wak e situashon di parehanan homoseksual na Kòrsou.

Na 2018 parlamentarionan Stephen Walroud (PAR) i Giselle Mc William (MAN) a entregá proposishon di lei pa matrimonio di mesun sekso òf registrashon di esaki. E dos damanan durante tratamentu di e kaso na korte a konfirmá ku e inisiativa di lei a keda saka for di e trayekto di legislashon.

Hues a hasi un análisis di partidonan ku durante elekshon tabata pro matrimonio di homoseksual  kual tabata DP, KEM, KUMUN, PIN i VISHON. Esnan ku tabata pro rekonosementu di partner legal ta MAN, PAR i PNP. For di resultadonan di elekshon ta resultá ku ocho partido huntu tabatin mas di e kantidat di votonan esta 44.265 di 84.846. For di esaki por konkluí ku e punto di bista di e partidonan tokante lei di relashon di homoseksual, mas di mitar di e votadornan no a stroba nan  di sostené e partidonan aki, segun sentensia di hues.

 

 

LAGA UN KOMENTARIO

Please enter your comment!
Please enter your name here