MIAMI (AFP).- Un hues merikano a blòkia e desishon di gobièrnu di Merka pa pone fin na e status di protekshon (TPS) pa migrantenan haitiano, un sistema ku ta imperio e ekspulshon di personanan prosedente di paisnan konsiderá komo peligroso.
TPS ta permití prinsipalmente e 350.000 haitianonan bibá na Merka pa por traha legalmente. Den un sentensia di 83 página, e hues Ana Reyes ta deklará ku e sekretaria di Seguridat Nashonal, Kristi Noem, no tin e fakultat pa pone fin na e status ei. “E demandantenan (sinku siudadano haitiano) ta bisa ku e sekretaria Noem di forma intenshonal a tuma su desishon pa pone fin na e TPS i esei komo hostilidat pa inmigrantenan no blanku. Esei ta parse hopi probabel”, segun e hues a skirbi. E desishon di Kristi Noem ta “arbitrario i kaprichoso”, segun Reyes.
”Kristi Noem tin derechi, a base di e Promé Enmienda, pa yama inmigrantenan asesino, parásito, probechadónan i kualke otro kos no apropiá ku e ta deseá”, segun Ana Reyes a skirbi. “Pero, e ta obligá na respetá lei”, segun el a agregá.
Na Florida, kaminda mas ku 150.000 haitiano ta biba ku TPS, kativistanan i polítikonan lokal ayera a selebrá e desishon hudisial, ounke rekordando ku e gobièrnu di Donald Trump por disidí na hiba e kaso pa Korte Supremo. “E kos aki ta un paso padilanti, un respiro, pero un respiro no ta duna stabilidat. Haiti ta enfrentá un violensia sin presedente, tambe instabilidat polítiko i kolapso di hinter e infrastruktura”, segun Marlein Basien, komisionado dje kondado di Miami-Dade i aktivista haitiano. “Si no ta sigur pa siudadanonan norteamerikano biaha pa Haiti, si no ta sigur ku avionnan ta bula pa Haiti, e ora ei, por Dios, no ta sigur pa manda ningun hende bèk kontra di su boluntat”, segun el a trese dilanti”.
