BUENOS AIRES, AP.- E eks presidente di Argentina i senador aktual, Cristina Fernandez a akusá su susesor Mauricio Macri di liderá un kampaña pa persiguí oposishon. Esaki a pasa algun ora despues ku un hues federal a pidi pa e wòrdu detené pa enkubrí pa iranínan akusá di e atentado kontra un sentro hudiu na Buenos Aires na aña 1994.
Fernandez a wòrdu akusá di traishon kontra patria tambe, un di e delitonan kastigá di forma mas severo pa lei argentino.
Esaki ta promé biaha ku un hues ta ordená detenshon di e eks presidente, kende ta konfrontando mas investigashon hudisial pa labamentu di plaka ku e tabata risibí pa athudikashon di obranan públiko.
Den un konferensia di prensa den Kámara di Diputado, Fernandez a señalá Macri komo “esun responsabel di un organisashon polítiko i hudisial pa persiguí oposishon”.
Fernandez a hura komo senador nashonal siman pasá pa un periodo di seis aña. Pa e wòrdu detené, manera hues federal Claudio Bonadio ta rekerí, Senado mester retirá e eks presidènt su inmunidat ku voto di dos terser di integrantenan di e kámara, kual no ta sigurá aktualmente.
Si e senador su inmunidat no wòrdu retirá, e hues por sigui investig’é i eventualmente mand’é huisio ya ku inmunidat parlamentario ta proteh’é solamente di aresto.