AUSTIN, USA (AFP).- Un hues di Texas a outorisá aborto serka un muhé di kende su embaraso ta menasá su fertilidat i su bida, den e promé kaso di e tipo aki for di despues ku den 2022 den Korte Supremo norteamerikano a eliminá e derecho federal dje prosedimentu aki.
“E idea ku señora Kate Cos di forma desesperá ke ta mama i ku e lei aki por pone ku e ta pèrdè e kapasidat ei, ta impaktante i lo ta un eror hudisial pa no konsedé e solisitut. “Komo tal, lo mi firma e petishon ku lo keda prosesá”, segun e hues Maya Guerra Gamble di Distrito 459 dje Condado de Travis, ku sede na Austin, despues di a skucha e argumentonan den un oudiensia virtual.
Kate Cox, di 31 aña i mama di dos yu, a haña ku su di tres yu na kaminda tin trisomia 18, un kondishon genétiko ku, segun e demanda kontra di Texas, por okashoná aborto spòntan, tambe ku e yu lo nase morto òf ku e ta sobrebibí den kondishonnan difísil pa poko tempu.
Na Texas aborto ta ilegal i e demandantenan ta reklamá ku e eksepshonnan médiko no ta bon kla i ku ta intimidá dòkternan. Pa e motibu ei Cox, ku 20 siman di embaraso, a pidi intervenshon hudisial via di un demanda kontra estado di Texas.
“Bida di Kate Cox i su futuro fertilidat ta kore gran riesgo, segun su dòkter, i komo tal atenshon médiko den e kaso aki ta na fabor di un aborto”, segun abogado di e señora a duna di konosé.
E estado konservador aki den zùit di Merka tambe tin un lei ku ta permití pa kualke siudadano demandá un otro ku hasi òf yuda pa hasi un aborto.
Pa e motibu ei, e kasá di Kate, Justin, pa garantisá ku lo no kuminsá un kaso kontra di dje, a uni su mes na e petishon i meskos a keda hasí pa su ginekólogo.
Dòkternan na Texas deklará kulpabel pa realisá aborto ilegal por enfrentá kastigu di prizòn di te ku 99 aña, tambe multa di 100.000 dollar i revokashon di nan lisensia profeshonal.
