Hues kier sa kon ta hasi ku hòmber ku a mishi ku zùster ora e sali prizòn

... Abogado mr Becher a trese dilanti pa tene kuenta ku deklarashon di su kliente tabata konsistente. Esta ku loke ku e zuster ta bisa no ta bèrdat.

Akusado ta insistí ku dama tabata papia kosnan inmoral kuné

WILLEMSTAD,- Korte di promé instansia ayera a trata  kaso di e hòmber L.A.(25) parsialmente. L.A. ta un pashènt ku ta sufri di un malesa mental i ta keda akusá di a mishi ku parti íntimo di e zùster ku ta pas’e angua dia 5 di mart último.

E kaso a keda posponé pa motibu ku hues kier sa kiko lo pasa ora e akusado sali fo’i prizòn ku su pasamentu di angua. E akusado a bisa ku e tin un tata ku ta traha na CMC i ku por pas’e angua.

Segun e akusashon, e akusado a uza violensia obligando e dama pa kometé aktonan di inmoralidat. E zùster a deklará na polis ku el a bishita e akusado pa pas’e su angua. E dia enkuestion, e akusado tabatin su karson baha te na su rudia. Na momento ku e dama a kaba di pas’e angua na su atras, e akusado a bira ku kara pe kue bras’e i bis’e dun’e un sunchi. Na momento ku e zùster kier a ranka bai, e akusado lo mester a keda kuné tene i bis’e ku e no ta bai niun kaminda sin dun’e e sunchi. E akusado na su turno, a kue e zùster mas duru ainda tene, mishi ku su pechunan i tambe su parti íntimo.  El a bent’e abou ku forsa i e dama a kai sintá riba flur. E akusado a rank’e den su kabei i purba habri su karson.

Ora ku hues a puntra e akusado dikon el a hasi e esaki, el a bisa ku konstantemente e zùster tabata papia kosnan inmoral  kuné i a puntr’e entre otro si e sa haña erekshon òf si e sa masturba.

Segun deklarashon di e zùster mas aleu, e akusado  a bis’e “mucha yòn bo ta, tur kos bo tin ku hasi p’ami”.

Na polis e akusado a deklará  ku loke e zùster a bisa no ta kuadra ku bèrdat. El a bisa ku e dama a provok’é na vários okashon. El a trata na mishi ku e dama bèrdat pero ora e dama a bis’e pa stòp, el a hasi esei tambe.

Hues a relatá ku e akusado ta den Capriles for di su 20 aña. P’esei hues ke un rapòrt sikiátriko pa yega na un bon desishon. E kaso a keda posponé pa dia 6 di yüli binidero kaminda abogado lo hiba su defensa i fiskal su rekisitorio.

SHARE

LEAVE A REPLY