..Hues William Alsup kende a anulá desishon tumá pa Donald Trump…
WASHINGTON (AFP).- Un hues a duna òrdu na seis agensia federal pa restituí na nan puesto algun shen funshonario kendenan a keda retirá den kuadro dje plan di presidente Donald Trump pa redusí e aparato públiko.
E hues William Alsup a konsiderá ku pa hustifiká e retironan masivo ku “pober prestashon” ta “un manera pa evadí e prosedimentu”, segun e korant The New York Times.
Alsup, komo veredikto riba un demanda presentá pa sindikato di trahadónan, a ordená e departamentonan di Finansa, Asuntunan di Veterano, Agrikultura, Defensa, Energia i Interior pa tuma bèk esnan ku a keda retirá.
“Ta un dia tristu ora ku nos gobièrnu ta duna retiro na algun bon empleado i ta bisa ku a basa esei riba nan prestashon siendo ku nan sa ku esei no ta bèrdat”, segun e hues den tribunal dje distrito na San Francisco.
For di momentu di su regreso den White House, den yanüari, Trump a tuma kantidat di medida pa kòrta den gastu di gobièrnu federal, inkluso retiro di desena di míles di e mas ku dos mion trahadónan di gobièrnu federal.
Vários hues a dikta sentensia kontra dje medidanan aki.
Luna pasá, Alsup a ordená gobièrnu federal pa anulá e desishonnan ku a resultá den retiro di míles di empleado. Ayera, el a bisa ku gobièrnu por tin derechi pa redusí su personal, pero ku mester hasi esei di forma korekto i ku hustifikashon.
