HOUSTON (AFP).- Un hues federal norteamerikano a blòkia un plan di gobièrnu di Donald Trump pa deportá algun shen mucha guatemalteko kendenan a yega Merka sin kompania di un adulto. Aproksimadamente 600 mucha lo a keda manda bèk segun un akuerdo firmá entre Merka i Guatemala.
E muchanan migrante sin mayor òf tutor legal na Merka ta den internatnan di gobièrnu. Algun di nan tabata na Texas, kaminda na kabamentu di ougùstùs komo 76 tabata na punto di keda deportá den oranan di mardugá, segun e organisashon humanitario Sentro Nashonal di Derecho Migratorio (NILC na ingles) i un asosiashon di abogadonan ku ta traha pa personanan den riesgo di deportashon.
NILC a presentá un demanda kontra dje Sekretario Norteamerikano di Seguridat Nashonal, Kristi Noem, i otro funshonarionan gubernamental, pidiendo hustisia pa blòkia e deportashonnan, alegando ku vários dje menornan tabata keda eksponé na peliger. Abogadonan di gobièrnu di Trump a sigurá ku famianan dje menornan tabata warda riba nan na Guatemala.
E hues di distrito den Washington DC Sparke Sooknana, a blòkia e deportashonnan pa 15 dia. Ku e plaso kasi pa vense, e hues di distrito Timothy Kelly a ekstendé e blokeo i esaki miéntras ku e kaso dje menornan ta keda habrí.
Segun NILC, mayoria dje muchanan guatemalteko ta indígenonan i ta papia idiomanan otro for di ingles òf spañó. Pues por lo pronto nan ta keda Merka.
