WASHINGTON (AFP).- Ayera un hues a publiká un nota di suisidio ku supuestamente a keda skirbí pa e delinkuente seksual konvikto, Jeffrey Epstein, algun siman promé di su morto, den un prizòn di New York. Un kompañero di sel di Epstein a bisa di a haña e nota den un buki despues ku Epstein a purba, sin éksito, di kometé suisidio. Esei tabata vários siman promé ku su morto den ougùstùs di 2019.
“Nan a investigá mi durante di lunanan largu… Nan no a haña nada”, segun por lesa den e nota skirbí na man. “Ta un regalo di por eligí e momento pa yama ayó”. E teksto ta konkluí ku: “Kiko bo ke mi hasi, sinta yora. No ta nada prèt… no ta bale la pena”.
E karta tabata wardá di forma sekreto durante di añanan komo parti di e proseso penal kontra e kompañero di sèl di prizòn na California. E hues Kenneth Kras di Tribunal di Distrito Zùit di New York a publiká e nota despues di un solisitut di New York Times.
Aunke e dokumento no a keda outentiká, el a keda publiká na momento ku ta sirkulá preguntanan riba morto di Epstein na edat di 66 aña miéntras ku e tabata warda pa keda husgá pa akusashonnan di trafikashon seksual. Su morto a keda deklará komo suisidio, pero vários negligensia di seguridat den e prizòn i falta di grabashon di kámara, a alimentá dudanan persistente riba e vershon ofisial. A haña Epstein heridá den su sèl na kabamentu di yüli di 2019, den loke outoridatnan a kalifiká komo un intento di suisidio.
E kaso di Epstein a sigui sakudí polítika norteamerikano i britániko, ya ku a publiká dokumentonan relashoná ku investigashon ekstenso riba bida dje delinkuente seksual durante di lunanan promé ku su morto.
