Riba e portrèt di ofisina di presidente di El Salvador, por mira venezolanonan ku segun hustisia ta miembronan di e gèng kriminal venezolano Tren de Aragua. Hues na Merka a sentensiá ku no por sigui manda venezolanonan pa e prizòn salvadoreño.
LOS ANGELES, USA (AFP).- Un hues federal a suspendé e plan di gobièrnu di presidente Donald Trump pa revoká Status di Protekshon Temporal (abreviashon TPS na ingles) i komo tal no por sigui deportá migrantenan venezolano.
E suspenshon ta drenta na vigor miéntras ku ta eksaminá e kaso i lo e mester ta un alivio pa 350.000 siudadano dje pais suramerikano den teritorio merikano, di kua nan TPS ta ekspirá dia 7 di aprel.
”Eliminá e TPS lo ta un menasa pa kousa un daño ireparabel na algun shen mil persona, tambe lo kosta Merka míles di miónes di dollar na aktividat ekonómiko i lo perhudiká e salú i seguridat públiko”, segun e hues Edward Chen den su veredikto emití na San Francisco.
TPS ta protehá kontra di deportashon i ta duna derechi di por traha. Ta duna esaki na estranheronan ku no por regresá nan pais di manera ‘safe’ pa motibu di guera, desaster natural òf otro kondishon “ekstraordinario”. Ta trata di un protekshon konsedé ampliamente na venezolanonan bou dje mandato di e demokrat Joe Biden.
Trump a purba na revoká e protekshon ei poko dia despues di su regreso den White House den yanüari i a hasi kampaña bou dje argumento ku Merka ta víktima di un “invashon” di migrantenan, spesialmente venezolanonan kriminal.
“Pa generalisá i konsiderá tur venezolano di TPS ku nan ta kriminal ta karesé di fundamentu i ta hole na rasismo”, segun e hues den su desishon. El a señalá ku e tasa di krímen serka e migrantenan aki ta “mas abou ku e poblashon general”.
