E migrante salvadoreño i residente di Merka Kilmar Abrego Garcia ta kana huntu ku su kasá Jennifer Vazquez, na momento di a yega na US Immigration and Customs Enforcement (ICE) na Baltimore, Maryland.
WASHINGTON (AFP).- Un hues na Merka ayera a ordená gobièrnu di Trump pa liberá e inmigrante salvadoreño Kilmar Abrego, deportá pa eror den luna di mart i despues hibá bèk Merka despues di lunanan di bataya hudisial. E kaso di Abrego Garcia, kende e gobièrnu di Trump a purba na ekspulsá pa diferente pais afrikano, a bira un símbolo pa esnan ku ta oponé na e polítika di deportashon masivo di inmigrantenan.
Den su desishon di ayera, e hues federal di Maryland Paula Xinis a konkluí ku Abrego Garcia ta detené ”sin hustifikashon legal”. Konsekuentemente, ta pidi Departamento di Seguridat Nashonal i Servisio di Inmigrashon i Kontrol di Duana (ICE) pa konfirmá ku e òrdu di liberashon a keda kumplí ayera mes promé ku 5’or di atardi. E desishon por keda apelá un biaha mas di parti di gobièrnu.
“E desishon aki no tin ningun base hurídiko i nos lo sigui lucha ku uña i djente dilanti di tribunalnan”, segun e sup sekretaria di Departamento di Seguridat Nashonal, Tricia McLaughlin, akusando e hues di “aktivismo hudisial”.
Abrego Garcia, residente di Maryland, a yega Merka di forma ilegal for di El Salvador na edat di 16 aña den 2012. Kasá ku un merikano, el a biba na Merka bou di status legal protehá for di 2019, na momento ku el a keda detené durante di un kontrol polisial i un hues a diktaminá ku no por deport’é pa motibu ku e ta kore peliger den su pais di orígen. Su kasá a denunsi’é na dos okashon pa maltrato, pero despues a defendé dilanti di outoridatnan.
Abrego Garcia den luna di mart a bira un dje 200 personanan ku a keda mandá pa e mega prizòn CECOT di El Salvador, e mayoria pa motibu ku supuestamente nan ta miembro di un geng venezolano, komo parti dje ofensiva di Trump kontra di personanan sin dokumento.
Departamento di Hustisia despues a atmití ku e salvadoreño a keda deportá debí na un “kibokashon atministrativo”. Abrego Garcia a keda hiba bek pa teritorio merikano den yüni, pero djis despues a detené den e estado di Tennessee bou di akusashon di tráfiko di persona.
