BOGOTA (AFP).- Un hues di Colombia a ordená e presidente dje pais, Abelardo de la Espriella, pa e kita for di páginanan sosial di presidensia vários video riba kua por mir’é ta kana entre kadavernan di supuesto kriminalnan matá pa militarnan.
E mandatario ultraderechista a yega na poder ku e promesa di bringa guerieronan i otro organisashonnan kriminal ku man duru. For di despues ku el a keda instalá, ehérsito a lansa tres bombardeo ku a laga por lo ménos 42 morto, entre nan seis menor di edat.
De la Espriella a risibí e videonan publiká riba wèpsait ofisial di presidensia i tambe riba Instagram dianan 2 i 4 di sèptèmber, den kua por mira kon e ta kana meimei di kurpanan hinká den sakunan di plèstik despues di a duna informashon riba resultado dje atakenan militar.
Pa motibu dje publikashonnan ei un parlamentario di Partido Verde a bai korte pa solisitá pa hustisia eliminá e grabashonnan ei for di retnan sosial. Korte di Bogota a aseptá e demanda i a ordená provishonalmente “pa skonde e publikashonnan pendiente di un desishon firme sin ku esei ta enserá eliminashon definitivo dje videonan”.
