FLORIDA, Miami (AFP).- Un hues federal di Merka a ordená pa divulgá e transkripshonnan di un ‘grand jury’ enkargá ku e investigashon na Florida riba e delinkuente seksual Jeffrey Epstein. Departamento di Hustisia a solisitá pa desklasifiká e archivonan despues ku Donald Trump luna pasá a firma un lei ku ta eksigí pa publiká e archivonan relashoná ku Epstein.
E kontenido di e investigashon dje ‘grand jury’ normalmente ta keda sekreto. Hustisia anteriormente a rechasá un petishon di Departamento di Hustisia pa desklasifika e transkripshonnan dje kaso di Epstein na Florida. Na e okashon aki, e hues federal dje distrito Rodney Smith a bisa djabièrnè ku e Lei di Transparensia di Archivonan di Epstein, aprobá pa Kongreso apesar ku na un promé instante Trump tabata kontra, mester keda divulgá. Epstein den 2008, na Florida, a deklará su mes kulpabel dje akusashon di a solisitá servisio di un menor di edat pa prostitushon. E finansiero a bolbe keda detené den 2019 akusá di tráfiko seksual ku menornan di edat.
Epstein a kometé suisidio na momento ku e tabata den detenshon preventivo den un prisòn di New York. Departamento di Hustisia tambe a solisitá e publikashon dje dokumentonan di e ‘grand jury’ di New York i esun di Ghislaine Maxwell, kende ta kumpliendo un kondena di 20 aña di prizòn pa motibu di tabata buska menornan di edat pa Epstein. Trump , ku tabata amigu íntimo di Epstein, a lucha durante di lunanan largu pa stroba publikashon dje archivonan. Sinembargo, dia 19 di novèmber el a sede pa e preshon di su kompañeronan republikano di Kongreso.
