E presidente norteamerikano Donald Trump un biaha mas ta mira kon korte ta para un desishon ku el a tuma.
MIAMI, USA (AFP).- Un hues federal di Florida a rechasá un demanda di 15.000 mion dollar pa difamashon presentá pa e presidente di Merka Donald Trump kontra dje korant The New York Times. E demanda di 85 página presentá a Trump dia 15 di sèptèmber kontra di New York Times “no ta apropiá i no ta atmisibel”, ya ku e no ta respetá e normanan di prosedimentu, segun e hues Steven Merryday den su veredikto.
E hues a referí na e gran kantidat di akusashon i keho kontra dje korant, pero ku esakinan ta karesé di base. Den e demanda kontra dje korant, tambe kontra di kuater periodista i un kompania editorial, Trump a denunsia e publikashon ku un menospresio riba e orígen di su fortuna i “tres artíkulo falsu, malisioso i difamatorio”
E korant norteamerikano a kontestá ku e akshon hudisial “ta karesé di un base”. E no ta basá riba ningun reklamo hurídiko legítimo i su úniko meta ta pa impedí periodismo independiente”, segun el a agregá.
Trump a presentá e demanda despues ku New York Times a publiká algun artíkulo riba un supuesto karta di kumpleaño mandá pa e presidente den 2003 na Jeffrey Epstein, empresario ku nan a haña morto den 2019 den prizòn promé ku un kaso kontra di su persona akusando e di eksplotashon seksual.
