Manifestantenan pro Maduro i Flores na Merka
NEW YORK, MERKA, AFP.- E èks presidente venezolano Nicolas Maduro i su kasá lo paresé den korte den yüni di 2027. Asina korte a disidí djárason, despues ku ehérsito merikano a kapturá nan den un operashon den yanüari.
E èks mandatario di 63 aña i su kasá, Cilia Flores, tin mas di shete luna detené den un prizòn na Brooklyn. Nan a keda deklará inosente pa akusashonnan di narkotráfiko i delitonan relashoná ku arma di kandela.
Komandonan merikano a kapturá e pareha den nan kas na Caracas riba 3 di yanüari. E operashon a kombiná forsanan naval, aéreo i riba tera i a pone fin na e gobièrnu di Maduro. El a dirigí Venezuela desde 2013.
Manifestantenan a reuní dilanti di korte di Manhattan ku bandera di Venezuela pa protestá pa liberashon di Maduro. Otronan a protestá kontra di maduro i su kasá Flores.
Maduro a deklará su mes un “prisionero di guera” i a ninga e kuater akusashonnan den su kontra. E ta akusá ku konspirashon pa kometé narkoterorismo, konspirashon pa importá kokaina, poseshon di armanan outomátiko i otro aparatonan destruktivo, i konspirashon pa poseé e tipo di armanan aki.
Desde ku a kapturá Maduro, Venezuela ta bou di maneho di su èks visepresidente i aliado serkano, Delcy Rodriguez. Merka ta kontrolá tur eksportashon di petroli di e pais. Entradanan di e eksportashonnan aki ta keda depositá riba kuentanan spesial supervisá pa Washington.
Un manifestante kontra Maduro i su kasá
