GINEBRA, AP.- Saudi Arabia a realisá un oudiensia nobo pa 11 persona akusá pa asesinato di periodista Jamal Khashoggi, segun informashon di un eksperto di Nashon Uní. El a kritiká e reino pa su falta di transparensia hudisial.

Agnes Callamard, enkargá ku kasonan di ehekushon ekstrahudisial, sumario òf arbitrario a bisa ku el a haña sa di e proseso aki siman pasá, na momentu ku el a bishitá Turkia pa investigá e asesinato.

Khashoggi, kende tabata traha pa The Washington Post i kritiká e prínsipe heredero saudi Mohammed bin Salman, a wòrdu asesiná i desmembrá den e konsulado saudi na Istanbul aña pasá. Su restunan no a wòrdu hañá.

E krímen, deskribí pa ekspertonan turko i merikano komo e resultado di un kòmplòt, a provoká denunsianan na nivel internashonal pa falta di libertat di prensa den Saudi Arabia.

Turkia, kende ta realisando su propio investigashon den e kaso di Khashoggi su asesinato, a denunsia ku e saudinan n ta koperá i a pidi un investigashon internashonal pa e kaso aki.

Saudi Arabia a kuminsá ku un kaso kontra 11 persona, inkluyendo algun amistat personal di e prínsipe i a pidi kondena di morto a sinku. E pais a ninga ku Khashoggi a muri na e konsulado durante vários siman.

E segundo oudiensia a tuma lugá riba 31 di yanüari. El a agregá ku “no tin sufisiente atenshon públiko pa e proseso” i ku prensa no tin pèrmit pa asistí e kaso.

LAGA UN KOMENTARIO

Please enter your comment!
Please enter your name here