WILLEMSTAD.- Minister hulandes di Asuntunan di eksterior Stef Blok djaluna último a kontestá preguntanan tokante sinku piskadó kurasoleño ku ta será den prisòn na Venezuela pa kasi un aña largu. Segun Blok embahada di Reino Hulandes na Venezuela a tuma kontakto ku outoridatnan venezolano na diferente okashon, via e kanalnan diplomátiko. Embahada hulandes a pidi Venezuela pa garantisá derecho i fasilidatnan pa e sinku personanan. Tambe Hulanda a pidi Venezuela un tratamentu pronto i hustu. Blok a bisa  ku e sinku hòmbernan te ainda ta den aresto preventivo i ku e kaso te ainda no a wòrdu tratá dor di hues. Pero segun informashon resien e kaso lo wòrdu tratá dor di un hues riba término kòrtiku.

Tokante situashon di detenshon na Venezuela Blok ta bisa ‘ku den general e situashon ta hopi malu den prisònnan di Venezuela, i esaki ta konta tambe pa e sinku hòmbernan’. Nan ta huntu den un sèl den un prizòn ku ta basta leu for di Caracas – segun Blok ku outo e ta mas ku seis ora for di Caracas. Personal di embahada hulandes ta duna e piskadónan asistensia for di konsulado. Personal tambe a bishitá e grupo. I nan tin kontakto ku famia di e sinku personanan.

Blok a reakshoná riba preguntanan di parlamentario den Tweede Kamer pa partido D66, Sjoerd Sjoerdsma. Dia 1e di febrüari di e aña aki el a lanta pregunta na e minister enkargá ku asuntunan di eksterior tokante di sinku piskadó ku ta será den prisòn na Venezuela for di luna di Mart 2020. Tata di un dje piskadónan ku ta detené na Venezuela a manda pidi Hulanda yudansa pa por saka su yu i e otronan liber.

Ta trata di kuater hòmber kurasoleño piskadó i un hòmber venezolano – ku tin pèrmit legal pa traha i biba na Kòrsou – ku den pleno “lockdown” na Mart di 2020 a subi laman i a keda detené den awanan teritorial di Venezuela.

E sinku piskadónan a bisa di a bai tuma piská riba laman serka venezolanonan. Sinembargo nan a bai den teritorio venezolano i nan a keda detené pa Wardakosta venezolano. Na Venezuela nan ta ser sospechá di kontrabanda.

 

LAGA UN KOMENTARIO

Please enter your comment!
Please enter your name here