UPDATE WILLEMSTAD.- Gobièrnu di Hulanda ta habrí pa kompartí konosementu i eksperensia ku gobièrnu di Kòrsou riba introdukshon di leinan anti diskriminatorio. Esaki minister hulandes di Asuntunan Interno i Relashonnan den Reino, Judith Uitermark a duna di konosé riba preguntanan di miembronan di parlamento Hulandes (“Tweede Kamer”).
Ministerio di Asuntunan Interno i Relashonnan ta duna di konosé komo punto aklaratorio despues di un enkuentro ku prensa digital djabièrnè 21 di febrüari ku sekretario di estado Zsolt Szabó. E ministerio ta indiká ku introdukshon di leinan anti diskriminatorio, òf leinan pa trato igual, ta un asuntu outónomo di e islanan.
Segun Zsabó e minister hulandes a indiká ku e ta dispuesto pa pone ekspertonan disponibel pa yuda Kòrsou, Aruba i St. Maarten introdusí leinan ku ta garantisá trato igual den e respektivo paisnan. Habitantenan ku ta sinti ku nan mes víktima di deskriminashon por hasi un apelashon pa ayudo i asistensia a base di e leinan anti diskriminatorio akí.
Djamars 18 di febrüari último parlamento hulandes (“Tweede Kamer”) a aprobá e introdukshon di legislashon pa trato igual na islanan BES, Boneiru, St. Eustatius i Saba. Basá riba artíkulo 1 di Konstitushon hulandes e pais tin diferente lei na vigor ku ta garantisá trato igual. Na islanan BES sinembargo e leinan akí ainda no ta na vigor.
E punto di salida di gobièrnu hulandes ta ku e leinan mester konta pa Hulanda kompletu, a ménos ku tin un bon motibu pa desviá di esaki. For di investigashon a sali na kla ku habitantenan di islanan BES tambe ta sinti e nesesidat pa introdusí legislashon ku ta garantisá trato igual. Pa e motibu akí gobièrnu hulandes ta traha, entre otro riba petishon di e Kolegionan Ehekutivo, riba un proposishon pa introdusí legislashon korespondiente riba e teritorionan den Karibe.
Awor ku parlamento hulandes a bai di akuerdo ku e proposishon di gobièrnu, a manda esaki pa senado hulandes (“Eerste Kamer”) pa tratamentu. Despues ku senado tambe aprobá e proposishon di lei, e ta bira definitivo i por inisiá ku implementashon na islanan BES.
Esaki ta enserá ku habitantenan, den kaso ku nan ta sinti nan mes deskriminá, por hasi un apelashon pa haña ayudo i asistensia. Nan lo por akudí na un entidat ku ta spesialisá den e tipo di ayudo akí. Lo alohá e entidat aki na e lokèt di ayudo hurídiko ku ta den preparashon pa kada un di e islanan BES.
Foto:
…Minister Judith Uitermark…
