Segun parlamentario Derk Boswijk (CDA)
WILLEMSTAD/DEN HAAG.- Partido polítiko Hulandes CDA ta na fabor di sanshonnan nobo kontra Venezuela. Miembro di Tweede Kamer Derk Boswijk a hasi preguntanan tokante e tema aki djárason 7 di ougùstùs na minister-presidente Hulandes Dick Schoof i na minister di Relashonnan Eksterior Caspar Veldkamp.
Boswijk a pone nuebe pregunta tokante e resultado di elekshon pa un presidente nobo na Venezuela. E parlamentario ta indiká ku hopi pais, gobièrnu i organisashon internashonal ya a rekonosé e kandidato di e oposishon Edmundo González Urrutia komo e presidente legítimamente eligí di Venezuela. Minister di Relashonnan Eksterior di Merka resientemente a bisa ku e tin ‘prueba indiskutibel’ ku ta oposishon a gana e elekshon na Venezuela. Boswijk ke sa si gobièrnu hulandes ta na altura di e prueba.
Tambe e ke sa kiko ta e motibu pa Hulanda i Union Europeo te ainda no a skohe pa rekonosé e viktoria di e oposishon i kuantu tempu mas e gobièrnu Hulandes lo laga e Konseho Nashonal Elektoral di Venezuela keda wanta publikashon di e dato di voto ofisial.
Boswijk ta puntra si Hulanda ta dispuesto pa drenta den un koperashon ku Union Europeo i otro organisashonnan internashonal pa imponé sanshonnan òf otro medida kontra gobièrnu Venezolano. E ta puntra tambe kon Hulanda i Union Europeo por duna aporte i fortalesa na oposishon di Venezuela.
