WILLEMSTAD.- Nòmber di Churandy Martina ta e ousente grandi den e ekipo di relevo di Hulanda ku próksimamente lo kompetí den Kampionato Mundial na Eugene, Merka. Huntu ku Martina, nòmber di Christopher Garcia tampoko ta aparesé den e ekipo ku Atletiek Unie a anunsiá pa e Mundial. Taymir Burnet, Hensley Paulina, Terrence Agard, Liemarvin Bonevacia i Ramsey Angela si ta presente.

Hulanda a presentá su atletanan pa e Kampionato Mundial, ounke pendiente ku World Athletics mes tambe lo anunsiá su ranking ku ta duna posibilidat pa mas atleta djòin e evento mundial ku ta tuma lugá di 15 pa 24 di yüli benidero.

E ousensia di Martina i tambe Garcia tòg no ta un sorpresa, konsiderando nan prestashon den e kampionato hulandes ku a tuma lugá fin di siman último.

Direktor Tékniko di Atletiek Unie, Ad Roskam, ayera a anunsiá tur e teamnan di relevo, pues 4×100 i 4×400  femenino i maskulino komo tambe e team miksto 4×400.

…Churandy Martina ta e gran ousente den e team hulandes…

Alrededor di 2000 atleta for di 200 pais lo tuma parti na e Kampionato Mundial. Hulanda den su team di 4×100 maskulino a inkluí Paulina  Burnet, ámbos di Rotterdam Atletiek.

E team maskulino 4×400 ta konta ku Agard, Bonevacia i Angela.

Atletiek Unie ta trese dilanti ku por nota ku den e selekshon falta algun nòmber konosí. Nan no a keda inkluí sea pa motibu ku nan no ta den nan mihó kondishon òf tambe teniendo kuenta ku nan lo ta preferá bai Kampionato Europeo mas lat e aña’ki na Munchen.

E ekipo maskulino 4×400 maskulino ta konta ku tur kuater atleta kendenan aña pasá a gana plata na Weganan Olímpiko, esta Bonevacia, Tony van Diepen, Angela i Agard.

LAGA UN KOMENTARIO

Please enter your comment!
Please enter your name here