KIEV, UKRANIA (AFP).- “Sin tardansa” Hulanda lo kuminsá manda avionnan F16 pa Ukrania, segun e minister hulandes di relashon nan Eksterior, Caspar Veldkamp, durante un bishita na Kiev durante fin di siman último.
Ukrania tin e speransa ku e avionnan aki di fabrikashon norteamerikano lo yuda pa nan protehá nan tropanan i siudatnan dje bombardeonan ruso diario.
Den su promé biahe internashonal despues di a asumí su funshon komo kansiyer, Veldkamp a sigurá ku Hulanda ta preparando pa manda e avionnan pa Ukrania, despues ku el a risibí lisensianan di eksportashon nesesario.
“Awor ku nos tin outorisashon pa e promé F-16-nan, esakinan lo keda entregá sin tardansa” segun Veldkamp a bisa den konferensia di prensa na e kapital ukraniano.
Detayenan dje biaha a keda den sekreto te ku ayera pa motibunan di seguridat.
E mandatario hulandes nobo no a duna detayenan ni a presisá pa ki dia e promé di e 24 avionnan F-16 primintí lo yega.
Veldkamp ta forma parti di un koalishon gobièrnu hulandes den kua e partido di ekstremo derecho Partij voor de Vrijheid di Geert Wilders ta e forsa prinsipal.
Vários pais miembro di OTAN a primintí di lo manda avionnan di fabrikashon norteamerikano, solisitá pa nan presishon, rapides i alkanse.
E presidente ukraniano, Volodimir Zelenski, a indiká den mei último ku nan tin mester di sigur 130 avion pa garantisá seguridat aéreo dje pais.
