DEN HAAG.- Gobièrnu di Brasil ayera a manda militarnan na frontera ku Guyana. Esaki ta konsekuensia di tenshon entre Venezuela i Guyana. Na Hulanda tambe tin atenshon pa e situashon tenso entre e dos pais. Nashonnan Uní lo tuma un posishon tokante e situashon djabièrnè 8 di desèmber.

Korant Algemeen Dagblad djaweps 8 di desèmber ta skirbi: ‘Angst voor een nieuwe oorlog, deze keer in Zuid-Amerika’. Ku ta nifiká ku tin miedu na Hulanda pa un otro guera rònt mundu, awor na Suramérika.

Presidente Nicolas Maduro  di Venezuela resientemente a entrega un proposishon pa kambia lei. Ku e proposishon Caracas ta reafirmá su reklamo di hopi dékada riba Esequibo, un parti di e pais Guyana. E region ta riku na petrolio i rekursonan natural ku ta keda atministrá pa e eks-kolonia britániko. Djadumingu 3 di desèmber tabatin referendum na Venezuela tokante  Esequibo.

Venezuela ya pa mas di un siglo ta reklamá e soberania riba Esequibo, un zona di 160.000 km2 ku ta kubri 70% di teritorio di Guyana, den kua ta biba 125.000 dje 800.000 abitantenan dje pais karibeño ku a bira independiente for di Reino Uní den 1966.

Presidente Maduro e siman aki a introdusí un mapa nobo di Venezuela, Riba e mapa nobo Esequibo ta parti di Venezuela. Segun Maduro esaki ta konklushon di e referendum di 3 di desèmber. Un impreshonante 95% di Venezolanonan a vota pa aneksá e teritorio.

Segun Korte Internashonal di Hustisia, ku sede na Den Haag, Venezuela mester “apstené di kualke akshon ku ta modifiká e situashon ku ta eksistí na e momento aki den e teritorio ku ta den disputa.” Caracas ta rechasá hurisdikshon di Korte di Hustisia Internashonal.

E poblashon di Guyana ta sinti miedu ku e forsa militar di Venezuela por ataka i aneksá e pais. Irfaan Ali, presidente di Guyana, a duna un diskurso televisá e siman aki kaminda el a enfatisá ku su gobièrnu ta hasi tur kousa pa protehá e fronteranan aktual di e pais. “E reklamo di Venezuela ta ilegítimo.”

Spesialista hulandes di Venezuela, Eva van Roekel, kende ta konektá na Vrije Universiteit na Amsterdam, ta bisa den un artikulo den Algemeen Dagblad ku presidente Maduro ta buskando un triunfo polítiko. “Den di dos mitar di 2024 tin elekshon na Venezuela. E situashon ekonómiko awor ta muchu difísil na Venezuela. Mi ta kere ku solamente 10% di poblashon ta sostené Maduro. Pero ku su akshonnan intensivo rondó di Essequibo, e ta krea un sentimentu di unidat den e pais ku por tin konsekuensia positivo den e elekshon di otro aña.”

LAGA UN KOMENTARIO

Please enter your comment!
Please enter your name here