Un bista di e sala kaminda e reunionnan ta tumando lugá di e 81 asamblea general di Nashonnan Uní
Nueva York, Merka, AFP.- Hunta di Pas di presidente Donald Trump a proponé djárason un plan di rekuperashon di 2,45 mil mion dòler pa Gaza, pa un periodo di seis luna, durante un reunion ku su miembronan i otro partidonan interesá.
E anunsio ta bin despues di lunanan ku e negosiashonnan tokante e plan di pas tabata kasi morto, loke a impedí kuminsá rekonstrukshon.
Nickolay Mladenov, representante haltu di Hunta di Pas pa Gaza, a pidi sosten pa e plan di rekuperashon. El a rekonosé tambe e difikultatnan den e negosiashonnan ku Israel, algun luna promé ku su elekshonnan.
Na okashon di Asamblea General di ONU na Nueva York, lidernan manera presidente franses Emmanuel Macron i presidente turko Recep Tayyip Erdogan a kondená e situashon humanitario katastrófiko na Gaza i a pidi pa pone fin na e konflikto ku Israel.
Segun kalkulashonnan di ONU, Banko Mundial i Union Oropeo, rekonstrukshon di Gaza lo rekerí alrededor di 70 mil mion dòler den un periodo di dies aña.
“Mirando e kompleksidat di loke nos ta konfrontando, mi ta kere ku, poko poko pero di forma firme, nos ta progresando,” Mladenov a bisa.
E representantenan di Trump, Jared Kushner i Steve Witkoff, tabata presente na e reunion di djárason. E proposishon di e hunta ta inkluí 66 proyekto, ku ta varia for di bibienda temporal te na kolekshon di restunan i rekuperashon di infrastruktura manera transporte públiko.
E plan ta kontemplá tambe desmilitarisashon di Gaza, loke lo rekerí ku Hamás tin di entregá su armanan i ku tin un retiro militar na e frente israelí.
Militantenan di Hamás a lansa un atake mortal na Israel dia 7 di òktober 2023, ku a sòru pa un reakshon militar masivo. For di e tempu ei, e teritorio palestino a keda dominá pa atakenan aéreo israelí.
Datonan di ONU di òktober 2025 ta mustra ku atakenan israelí a destruí òf hasi daño na 84% di tur struktura na Gaza.
