NEW YORK, AFP.- Hustisia merikano a bolbe rechasá e libertat bou di fiansa pa e panameño Luis Enrique Martinelli, yu di eks presidente Ricardo Martinelli, ekstraditá pa Merka i akusá di labamentu di plaka den kaso di Odebrecht.
Den un oudiensia via video den korte federal di Brooklyn, den kual a partisipá e akusado, e hues Raymond J Deane a rechasá un biaha mas e petishon di defensa pa e akusado bai liber sperando su kaso.
Hustisia merikano ta akusá Luis Enrique Martinell di 39 aña i su ruman Ricardo Alberto di 42 aña ku ta detené ainda na Guatemala sperando su ekstradishon, di a risibí 28 mion dòler di e empresa konstruktor brasileño Odebrecht, 19 di kual nan a pasa via kuentanan merikano promé di a terminá na Suisa.
E rumannan Martinelli a keda detené dia 6 di yüli 2020 na airopuerto internashonal di Guatemala ora nan a trata na biaha pa Panama. E ekstradishon di Lius Enrique Martinelli a edat aprobá pa un korte di Guatemala na mei pasá i di su ruman a keda outorisá na kuminsamentu di novèmber i por tarda un tiki promé e keda konkretisá. Panama tambe ta reklamá e rumannan Martinelli pa un skandal di korupshon igual relashoná ku soborno a kambio di trabounan, konosí komo Blue Apple.
