Un potrèt di desèmber 2016 di Luis Inacio Lula da Silva i Cristina Kirchner. Na e okashon ei tur dos tabata èks-presidente di nan respektivo pais.
BUENOS AIRES (AFP).- Hustisia argentino a bai di akuerdo ku un petishon di èks-presidente, Cristina Kirchner, den ‘huisarrest’ kondená pa korupshon, pa risibí bishita dje presidente di Brasil, Luiz Inacio Lula da Silva.
E aprobashon ta nifiká ku awe Lula da Silva lo tin akseso den kas di Kirchner den e kapital argentino i mester respetá e “kumplimentu estrikto” di reglanan di kondukta imponé pa tribunal pa “no stroba trankilidat dje besindario”.
Lula lo partisipá awe na Buenos Aires den e kumbre presidensial di Mercosur, den su promé bishita na Argentina for di despues di instalashon dje presidente Javier Milei den desèmber di 2023.
Abogadonan di Kirchner a solisitá e pèrmit di hustisia pa e bishita den e departamento dje bario Constitución kaminda ku for di 18 di yüni e ta kumpli ku un kastigu di seis aña pa froude. Ademas, Kirchner a keda inhabilitá pa bida largu pa ehersé funshonnan públiko.
E tribunal ku a konden’é a establesé ku e èks-presidente mester solisitá pèrmit pa risibí bishitanan ku no ta miembronan di su famia, dòkternan òf abogadonan.
Tambe a imponé algun regla di komportashon pa evitá konglomerashon di hende ku lo stroba órden públiko. A bin ku e reglanan aki despues di manifestashon di parti di simpatisantenan di Kirchner dilanti dje edifisio kaminda e ta biba.
Despues dje kondena di Kirchner, e mandatario brasilero a revelá di tabatin kontakto telefóniko ku e èks-presidente argentino i públikamente a ekspresá su solidaridat.
