PARIS, FRANSIA (AFP).- E eks promé dama franses Carla Bruni-Sarkozy a keda akusá den kuadro di un investigashon riba supuesto finansiamentu iregular di kampaña di su kasá, Nicolas Sarkozy, den 2007 ku sèn for di Libia. “Bruni ta keda investigá pa supuesto manipulashon di testigu (Ziad Takieddine) i tambe e ta keda akusá di a tuma parti den un asosiashon ku un grupo ku e meta pa kometé froude hudisial”, segun un fuente.

E kasá dje eks presidente a keda poné bou di kontròl hudisial ku e prohibishon pa hasi kontakto ku protagonistanan dje proseso, ku eksepshon di Nicolas Sarkozy.

Sarkozy, presidente di Fransia entre 2007 i 2012, den òktober di 2023 a keda akusá pa posibel manipulashon di testigunan, komo parti di un andanada di kaso legal kontra di su persona.

E investigador dje kaso di Sarkozy ta buska klaridat pa sa e motibu pakiko un testigu klave dje empresa, e empresario franko libanes Ziad Takieddine, a bisa di a entregá un maleta ku miónes di euro prosedente dje diktador libio Muamar el Gadafi na e hefe dje ekipo di Sarkozy pa despues hala’den e deklarashon ei.

Un investigashon a saka na kla ku Bruni a ‘delete’ tur e mensahenan interkambiá ku Michele Marchand, konsiderá e reina di paparazzi na Fransia, e dia ku esaki a keda akusá di manipulashon di testigunan den yüni di 2021.

Sarkozy lo keda husgá na inisio di 2025 pa a risibí fondonan di Libia den su kampaña. E ta keda akusá di enkubrimentu i malversashon di fondo i finansiamentu ilegal di un kampaña elektoral. E eks mandatario ta nenga e akusashonnan ei.

LAGA UN KOMENTARIO

Please enter your comment!
Please enter your name here