WILLEMSTAD.- Ayera I.B.F.F. ofisialmente a duna inisio na e ‘H2O Month’.
Luna di òktober, luna kaminda I.B.F.F. ta dediká atenshon spesial na e líkido mas presioso i importante ku tin na mundu, kual ta awa.
Ta konosí ku aki na Kòrsou nos ta disfrutá di un di e mihó kalidatnan di awa na mundu i ta netamente pa e motibu aki nos kier konsientisá no solamente nos pais pero mundu kompletu riba e importansia pa balorá i kuida esaki.
E ‘H2O Month’ ku lo bai kulminá den e sertámen internashonal di Miss Teen International 2017 ku lo tuma lugá di 7 pa 12 di novèmber aki na Kòrsou. Sertámen den kua diferente pais lo mustra nos kon nan ta hasi uzo di awa i ki apresio nan tin pa esaki na nan pais.
Durante e luna di òktober nos kier konsientisá kada un siudadano lokal pero tambe internashonal ku ta bendishoná kada dia di nobo ku awa limpi i purifiká pa kumpli ku nesesidatnan básiko di un ser humano, ku nan mester balorá i kuida esaki mas tantu ku ta posibel, mirando e echo ku na diferente parti di mundu tin personanan ku no ta karga e mesun suerte ku nos tin i ku ta anhelá di por tin un poko awa pa nan por hasi uzo di dje.
Pues e meta prinsipal di I.B.F.F. su ‘H2O Month’ ta pa krea konsenshi i promové konsientisashon riba uso di e tesoro natural mas importante ku e ser supremo a regalá nos na mundu.
No gasta awa pa loko, pero hasi uzo di dje na un manera efisiente ya asina nos por sigui disfrutá di dje.
