I nos a hunga Rei den Mei dilant’i kámara

Renaud Hendrik

Rei den Mei; Chèk e!

Aña pasá nos a entrevistá Renaud i Saffira Hendrik relashoná ku e wega di Rei den Mei. E reakshonnan tabata grandi. E bia aki ku e pareha tabata na Kòrsou, nos a invitá nan pa den studio nos por eksperensiá e wega i pa nos hendenan na kas tambe por haña un idea di Rei den Mei. Ta trata di un wega ku sigur lo midi i amplia bo konosementu pa loke ta papiamentu, historia i kultura di Kòrsou, dichonan i hopi mas.

Un tiki di Renaud i Saffira

Rei den Mei ta un wega di mesa di Kòrsou, kreá ku orguyo pa dos yu di Kòrsou: Renaud i Saffira Hendrik. E pareha aki, a nase i biba na Kòrsou, promé ku nan parti pa Ulanda den 2011 pa persiguí nan estudio. Renaud a studia Kímika na Universiteit Leiden, miéntras ku Saffira a sigui Sociale Pedagogisch Hulpverlening, di kual e ta praktiká den e área di kuido di mucha. Aunke nan bida profeshonal a forma den un ambiente Europeo, Kòrsou semper a keda yamativo pa nan bini bèk, un sintimentu ku ta bira mas fuerte kada biaha ku nan bishitá e isla. Na e momentu aki nan no ta kla pa regresá e isla, pero dor di krea proyektonan manera Rei den Mei nan ta keda konektá ku e isla i e kultura.

E proseso pa e proyekto

Renaud ta sigui bisa: “Nos a kuminsá den mart 2025 i a terminá mas o ménos rònt òktober.” Durante e lunanan ei, hopi kos a sosodé. Diseño a keda mandá, mester a kambié; i manera ta pasa ku tur proyekto kreativo, ora bo ta den e proseso, bo por lubidá sierto detaye.

Nan a kuminsá ku e título Rei mas palabra den mei sekònde, pero mas lat nan a realisá, ku e idea ei tabata simplemente imposibel, nan a konta chistoso. Asina e título a kambia pa Rei den Mei. Nan a kuminsá ku e kartanan promé, i despues a pasa pa e diseño di e bòrchi di e wega, kaminda kada stap ta representá algu konosí di Kòrsou, sea piská, pastechi, kenepa, batido, landhuis, i hopi otro símbolo lokal.

Pronto lo tin un sèt mas di Rei den Mei riba merkado

Renaud i Saffira i nan beibi tabata na Kòrsou i nan a bishitá nos. Rei den Mei ta pa nos dushi hendenan i den papiamentu. Tur kos ta diferente manera Renaud a splika nos. E ‘boardgame’, riba e kartanan tin dicho i charadanan i tur kos ta bai over di Kòrsou i papiamentu. Durante di e entrevista aña pasá, e pareha a bisa nos ku pa desèmber lo yega un sèt di e wega pero promé ku esaki a yega ya el a kaba, manera nan a konta nos. Na desèmber e loke a yega a kaba den un siman. Na febrüari a yega un sèt nobo i ya tur a kaba. Próksimamente nos lo bolbe haña un sèt mas, manera Renaud a bisa nos.

Reakshonnan positivo

E reakshonnan te ainda ta masha positivo. E hendenan ta graba video i manda pa nan i otronan ta kumpra pa regalá otro. E kalidat i e bista di e wega ta algu sumamente positivo. I banda di esaki ta siña hopi di Kòrsou. Durante di nan bishita na Kòrsou nan a bishitá un skol i ei nan a hunga Rei den Mei ku un grupo. E muchanan ta di 14 aña bai ariba i nan no tabata sa di e palabranan i nan a haña chèns di siña esakinan.

Siña hopi di papiamentu

Dia nan a kuminsá kolekshoná e palabra i dichonan, nan a siña hopi. Tambe di e gramátika di papiamentu. I asta awor ora Renaud mes ta hunga e ta siñando mas i mas. E wega ta siña bo pa splika algu mas mihó. Rei den Mei ta un wega ku ta hunga den tim, esta 4 tim. I 4 hende pa tim aunke si tin mas, ta mas dushi ainda. Tin sufisiente palabra pa rei. Tin hopi kos ta hunga un ròl pa e wega por dura. Tin 2400 palabra i tambe tin dichonan. E dichonan nan a saka for di un buki masha bieu ku a yega den nan man.

Pronto otro wega popular mundialmente pero ku un toke lokal

Lo bin un Rei den Mei 2. No ta nesesariamente pero di un ekstenshon di e kartanan. Por ehèmpel por pensa di tin un ekstenshon na ulandes i tambe unu spesial pa mucha. Ya nan ta besig ku esakinan, asina Renaud a indiká. I banda di esaki tin ideanan di mas spèl ku ta na kaminda ku ta konsentrá mas riba turista. I nan ta trahando un wega mas masha popular rònt mundu pero na nan sistema. E lo tin un toke kultural di nos hendenan kayente. I asina e wega Sali, Renaud a bisa, nan lo bin splika di dje.

Tene papiamentu na laira

Renaud a sigui konta nos ku e ta gusta Seú i el a bai kantadó Mayó. Loke ku Renaud ta gusta masha ta ku den e kantikanan di seú tin bia ta bin dilanti palabra i dichonan ku e no konosé. I esei tambe ta un forma pa nan kolekshoná palabra. El a menshoná por ehèmpel e palabra limania ku e konosé komo un grupo di tambú pero den e konteksto aki e tin otro nifikashon. E ta nifiká “mi kompader, mi hendenan, mi amigunan”. Ta algu nobo ku Renaud a siña. Meskos ku kachurelo, e no tabata sa ta kiko pero el a  haña sa ku esaki ta un hende ku ta supla kachu. Ta importante pa tene nos papiamentu haltu i esaki sigur ta Renaud i Safira su meta.

Pa hóben i esnan di mas edat

E aseptashon di Rei den Mei na Ulanda ta hopi grandi. Tur hende ku a kumpra e wega ta pa hasi un anochi dibertido ku nan famia. E wega no ta solamente pa hende hóben òf mucha pero hende grandi tambe. Renaud a konta kon un hende di edat ta yam’é pa kumpra un wega pa asina e ku su amigunan por sinta i hung’é.

I ban pa e wega

Renaud na palabra: “Ta un wega di 4 tim, nos tin e ‘baordgame’ i e tegelnan i tin blou hel, blou hel. E kartanan tin dos banda. Tin blou i hel i dependé e koló ku bo ta pará bo ta deskribí e palabranan. E dou tin 0, 2 i 1. E dou su intenshon ta pa bo tir’é i e kantidat di palabra ku bo rei si kisas bo a rei tur 5, i bo a tira ku e dou e number 2, bo tin di kita 2 for di e 5 i kana 3 paso riba e board. E dou ta pa kita for di loke bo a rei. Tambe tin e oloshi di santu ku ta 30 sekònde i tambe tin e 240 kartanan. E hungadó ta saka di un banda i ta hinka e karta bèk den e baki pero di e otro banda, ora e kaba.

Wak kon wega ta den e grabashon ku nos tin riba nos plataforma digital; Facebook, Youtube i wèpsait di EXTRA.