HOUSTON, AP.- Trahadónan sin pèrmit legal ta keda arestá òf deportá, miéntras ku e gerente i propietario di e empresanan ku ta kontratá e migrante no ta wòrdu akusá.
E kantidat di gerente i propietario ku a wòrdu demandá pa tuma trahadónan ilegal den servisio a keda stabil bou di mando di presidente Donald Trump. Tur sektor vinkulá ku imigrashon ilegal a intensifiká aplikashon di leinan relashoná ku esaki.
E entradanan hudisial riba shete planta siman pasá tabata e operashon di trabou mas grandi ku e gobièrnu di Trump a ehekutá. Esaki a generá detenshon di 680 persona ku ta ilegalmente den e pais.
Abogado i ekspertonan ta bisa ku e esfuerso i tempu pa investigá e gerentenan ta muchu mas kompliká ku detenshon di e trahadónan. Un opstákulo kontra esaki ta leinan federal ku ta stipulá ku e kontratashon di e trahadó sin pèrmit ta un delito solamente si e propietario ta na altura di e migrante su status. Mayoria propietario sa bisa ku nan no tabata na altura di e migrante su status.
E direktor interino di Servisio di Inmigrashon i Kontròl di Duana, Matthew Albence a bisa djamars ku tur esnan ku a violá lei na Mississippi mester wòrdu akusá, inkluyendo e “propietario ku ta benefisiá di e delitonan aki”. E òrdunan di aresto di Mississippi ta afirmá ku e gerentenan di dos planta a partisipá den e froude.
