CARACAS, VENEZUELA, AFP.- E konferensia Episkopal Venezolano a pidi medida di grasia ku ta permití e liberashon di prezunan polítiko ku motibu di e kanonisashon di doktor Jose Gregorio Hernandez i e religioso Carmen Rendiles ku lo tuma lugá dia 19 di òktober awor na Vatikano.
“Nos ta haña tambe ku ta un okashon apropiá pa outoridatnan di estado dikta medidanan di grasia ku ta permití esnan sera pa motibunan polítiko rekobrá nan libertat”, asina un karta pastoral ta motivá.
Segun iglesia venezolano, e medida aki ta faboresé e trankilidat i harmonia di e famia i esnan yegá na e prezunan polítiko, meskos ku na e sosiedat kompleto.
“Si doktor Hernandez i mama Carmen Rendiles tabata di pas i speransa, su kanonisashon mester hiba nos na traha disidí pa asina pas ta presente den kurason di tur venezolano i pa promové e señalnan di speransa den sintonia ku e proposishon di aña di hubileo”, asina nan ta bisa.
Esaki lo ta un estímulo fuerte pa tur venezolano apresiá komo yunan di un solo patria i ruman di otro, pa defendé bida i dignidat di e persona humano for di su konseshon te ku su morto natural, pa aseptá e diferensianan komo un rikesa i konstruí un mihó sosiedat den rèspèt mutuo, konvivensia i búskeda konstante di pas.
