Iita Itauski hóben diseñadó di moda aktualmente ta den su estudio na London, na un di e universidatnan mas rekonosé mundialmente. Iita Itauski su nòmber mes ta Joely Girigoria. E ta gusta moda for di chikí. Manera el a konta nos di Djasabra, for di skol básiko semper e tin su man yená ku armbant di diferente koló. Semper e ta gusta hasi yen kos ku su kabei. E ta semper otro i por mira ku e ta diferente. E tempu ei kisas asta por bisa ku Iita ta drùk pero e tabata su mes. El a keda ku e lo a bai den direkshon di kabei promé.
Kuminsá den kuido i kambia bai moda
Iita a hasi na Kòrsou ‘zorg en welzijn’ na Ancilla Domini pasobra e tabata gusta hasi kabei. Einan el a kuminsá na CDC pero no tabata echt algu ku e tabata ke. Den su promé trimèster el a ripará ku tabata un estudio ku no ta pe. Semper e ta gusta moda, bistimentu, tur kos kombiná, estilo. For di chikí tur hende ta bin serka dje pa sa di moda. E kier a bai mas profundo den moda i asina el a bai Ulanda. Na Mondriaan na Ulanda el a kuminsá ku ‘Mode maak en Kleding’ ku ta enserá ku e ta siña kon kurpa di hende ta, hende krioyo manera hopi di nos na Kòrsou ta. El a siña traha ku tur tipo di figura, el a siña traha paña riba midi di hende. Esei el a hasi 3 aña i ora el a kaba el a bai spesialisá pa traha ku kosnan na man “coutoure”. Di einan el a bai AMFI (Amsterdam Fashion Institute) ku ta e skol ku e ta bayendo aktualmente. Na e ta hasiendo un minor. Iita ta den su di tres aña i manera el a bisa e ta na London College of Fashion, hasiendo un spesialisashon di 6 luna.
Moda den famia
Si Iita ta den moda no ta nada straño. E ta bin di un famia den moda. Su mama, wela i tanta ta kose. E tin e den famia ounke for di chikí semper e tabata otro for di otro muchanan. Ounke su kaminda pa e kana yena den e estudio di moda, kaminda e ta aktualmente no a bai fásil. Ora el a bai Ulanda kosnan a kana bon, sin niun problema pa haña kamber manera e ta tende di otro studiantenan. El a bai Mondriaan 3 aña miéntras ku e tabata biba Rotterdam i di einan bai Den Haag tur dia. Esei tambe el a kaba den 3 aña i despues mester a hasi un “toelating”pa drenta AMFI. Einan Iita a ripará ku kosnan a kuminsá bira pisá. Ya pa basta luna, kasi un aña delantá e mester a kuminsá mèldu su mes. Esaki ta nifiká ku tin di kuminsá un trayektoria promé e lèsnan mes kuminsá. E mester a traha diferente ‘toets’, manda portafolio, traha tarea spesial i ora e kombersashon, e tin di bolbe traha un ‘toets’ pa asina logra un porsentahe pa por keda aseptá na e skol. E no tabata fásil pasobra segun Iita, AMFI ta konosí komo un di e skolnan mas pisa na Ulanda den diseño di moda. I pe e no tabata fásil tampoko pasobra banda di su skol e mester a traha i tin su mes negoshi. Su mayornan tabata yud’é pero e ta purba hopi bia pa no pidi yudansa i pa e mes por hasi su kosnan. E mester a traha i bai skol i esei a hasi e sirkunstansianan basta difísil. E tabata bai skol i tambe traha na un pòmp di gasolin. Iita a bisa ku tin dia e ta hopi kansá pero e tin di lanta pa sigui padilanti. I banda ku e mester a hasi tur esaki pa drenta Amfi, e tabata diseñá paña, shou di moda i tabata kore pa gruponan di karnaval.
Mi mes empresa di moda
Unabes el a drenta Amfi, e promé aña kos a kuminsá bira un tiki mas trankil. Tambe na 2020 el a kuminsá ku su mes empresa i asina e no mester a bai traha niun kaminda mas. Esaki a trese un tiki mas trankilidat pe pa e por kombin’é tambe ku su skol. I asina tambe el a logra di ta finansieramente un tiki mas stabil pa e por invertí den su skol tambe, kaminda e tin di kumpra material. 2021 tabata un di e añanan di mas duru pa Iita. Esaki debí na covid i su motivashon a baha un poko. AMFI ta eksihí hopi tempu di dje. E trabounan duru ku el a hasi, no ta algu pa semper. I esei ta loke el a pone su dilanti pa e sigui padilanti apesar di e demotivashon ku el a pasa un temporada den dje, apesar di e pandemia di covid i tantu tempu ku e mester a hinka den su skol. E tabatin un meta, asina el a bisa Djasabra.
Moda mas dirigí riba paña
Ora nos ta papia di moda, Iita a bisa ku e ta dirigí su mes mas den paña. E ta kose paña pa hende hòmber, hende muhé i mucha. Pero e ta focus riba su estilo. Den su empresa e mes ta kose, e mes ta diseñá, pinta, kòrta i asta e mes ta modelá i ora mester e mes ta saka potrèt. E sa traha ku otro yunan di Kòrsou ku ta ‘make up’ i hasi kabei na Ulanda den su shownan. E ta kere ku komo diseñadó di moda bo mester tin mas konosementu ku paña so. I den su kaso e tin e konosementu di kabei tambe, pa asina e por bisa presis kiko e ke, kiko e ta ferwaktu di su modelonan. E intenshon ta pa den futuro e tin un tim ku e por siña nan i delegá e trabou i asina e por saka e tantu trabou for di su man.
Moda awor
Pa loke ta e moda aktualmente Iita a bisa ku ta diferente kos ta hunga un ròl. Den moda tin kos pa tur hende. Awor aki ‘street wear’ ta hopi den moda pero kosnan di ántes ta biniendo bèk. E ta kòrda tempu ku e tabata chikí kos ku su mama tabata bisti i ku e tabata haña chapo, tur ta biniendo bèk. Por ehèmpel ‘heupbroek’ ta biniendo bèk. Tur e armbantnan ku e tabata bisti na skol básiko, tur ta biniendo bèk. Pa loke ta koló Iita a bisa ku den zomer bo ta haña koló ‘pastel’. Na Ulanda bo ta kustumbrá ku den wenter tin un koló i den zomer kolónan mas kontentu. Awor aki e koló di wenter tabata mas maron, krem, bèrdè shushi, pero ora wak bon tambe kolónan hopi bibu ta biniendo na moda i tambe di kueru. Iita ta gusta kueru e ta kontentu ku e ta biniendo bèk na moda. Kolónan ‘fel’ voral den wenter ta dominá.
Estudio na London
Pa loke ta su estudio na London el a bisa ku e ta masha dushi te ainda. El a kaba di kuminsá ku e estudio resientemente i e ta otro for di di Ulanda i otro for di Kòrsou. El a ripará ku su koleganan studiante ta masha amikal ku ta forma kombersashon i kaminda e ta haña chèns di splika di su pais Kòrsou. E ta e bida di Campus masha dushi ounke e no a haña un kamber riba Campus. E manera ku el a keda risibí a lag’é sinti manera ta añanan e ta bayendo klas ku nan.
Diseñadó pa artistanan
Iita su soño ta den grandi. E ta sigur ku aki 10 aña su marka lo ta konosí internashonalmente. E lo ta sigur ku aki 10 aña el a traha paña pa mínimo 5 pa 6 artista grandi manera Beyonce, Niki Minaj. Su soño mes ta pa bira un ‘celebrity designer’. E ke traha shimisnan riba midi pa artistanan grandi por presentá kuné. E tin su marka i ku diferente segmento di preis pa e yega tur grupo. Iita su mas JayG. I e ta spera ku e lo yega Kòrsou pronto ku su shownan di moda. E mes tabata modelá i ainda ta modelá sierto di su pañanan. El a yega di hasi hopi shou di moda pa skol i a traha kolekshonnan pa su mes shownan. Awor aki e no ta konsentrá riba shownan grandi pasobra nan ta tuma hopi tempu. E ke kaba su skol promé pa por yega na e shownan grandi. E ta keda aserká konstantemente pa shownan pero pa Iita e ke no e preshon ei riba dje awor aki.
Bisti loke bo ta sinti bu bon
Pa loke ta un hende yen i ku volúmen Iita ta konsehá pa semper sòru pa bo paña di abou ta bon. Bo BH i karson di abou mester ta bon na bo kurpa. Wak kosnan ku ta no skonde bo kurpa pasobra un hende tin di aseptá su mes. Bisti loke bo ke, loke bo ta sinti bu bon basta e ta para bu bon, Iita a bisa nos. E lo no konsehá hende yen bisti kosnan muchu hanchu ariba pasobra e ta hasi bu mas hanchu ariba, manera payèt. E lo konsehá pa bisti paña ku liña vertikal ku ta kamuflá e kurpa yen i paña pretu, ménos blanku. Blanku por ta keda bunita pero ta bon pa paga bon tinu pa e ta para bon. E ta kere ku un hende mester ripará si algu no ta para nan bon. “No bai tras di hende, bisti loke abo ke pero basta e ta para bu bon”, el a bolbe bisa nos.
“Bai pa bo soño, kere den bo mes, no wòri kiko niun hende bisa bu. Siña loke abo ta haña great i hasi loke bo ta hasi i sòru pa bo hasié bon i sòru pa bo ta un di e mihónan. No e mihó pero un di e mihónan. Bai tras di bo soño,lanta traha.Ora bo drumi nada ta kai for di shelu. E por ta duru pero kòrda ku ki meta bo ta hasié. No duda den bo mes pero lanta i kere den bo mes. Si bo mester di yudansa habri boka papia i bo tene bèrgwensa. Semper semper semper ser bo mes pasobra si bo no ta bo mes bo no ta yega niun kaminda”, palabranan di Iita Itauski.
