PARIS, Fransia (AFP).- E íkono di pòp franses, Patrick Bruel, a keda akusá ayera di violashon i agreshon seksual, despues ku kasi diesdos muhé a denunsi’é. Algun dje denunsianan ta akusashon ku ta bai te den dékada di 1990.
E kantante di 67 aña, durante di dékadanan un di esnan mas konosí di Fransia ku miónes di disko bendé, ta nenga tur e akusashonnan. Ta trata di un kaso nobo di un selebridat franses ku ta konta ku bista di hustisia a rais dje movementu #MeToo, despues ku aña pasá e leyenda di sine, Gerard Depardieu, a keda kondená na 18 luna di prizòn kondishonal pa motibu di agreshon seksual di dos hende muhé durante di un filmashon.
Bruel a pasa 48 ora bou di kustodia despues di a keda detené djaluna na Paris pa keda interogá. Un hues di Nanterre a indiká ku e artista a keda akusá di violashon, intento di violashon i agreshon seksual. Ministerio públiko a trese dilanti ku e akusashonnan ta referí na nuebe víktima i insidentenan ku a tuma lugá entre 2010 i 2019. Pero awor ta resultá ku tin 13 otro denunsia kontra di su persona i ku ta data entre 1992 i 2008.
