Ilse, Bertilio i Sherwin homenahiadonan di Seú 2019

... E homenahiadonan di Seú 2019 kompaña pa tres persona ku a risibí rekonosementu spesial. D.r.p.d: sr. Frensio Jamanika, sr. Shannon Richardson, sra. Ilse Monte, sr. Bertilio Fecunda i sr. Sherwin Anita. Pará: sr. Ludwig Isabella ...

WILLEMSTAD.- Ayera tardi durante dje rueda di prensa di Fundashon Kultural Seú Kòrsou e organisashon a presentá e tres homenahiadonan na kende Seú 2019 ta keda dediká.
Ta trata di sra. Ilse Monte, sr. Bertilio Fecunda i sr. Sherwin Anita.
ILSE MONTE
Ilse a risibí vários rekonosementu i diferente plakat. Ilse sa organisá diferente aktividat i te awe ta stima organisá aktividat pa chikí i grandi, entre otro Ilse ta hasi trabounan boluntario komo aporte na nos komunidat.
Ilse a kuminsá ku su grupo di seú ‘The Red Apple’ pa mucha ku awe a bira grupo ‘Flornan di Kadushi’ pa tantu mucha komo hende grandi i a bai Marcha di Seú 30 aña largu sin falta niun aña. E ta hasi esaki ku smak i dedikashon pa kada un miembro di e grupo i pa engrandesé Marcha di Seú.

BERTILIO FECUNDA
Bertilio a kontribuí na komunidat komo boluntario pa hopi aña. Di 1992 te ku 2017 pa Karnaval di Banda Bou i na aña 2012 el a keda honrá komo baluarte pa Karnaval di Banda Bou. Di 1992 pa 2002 i 2004 pa Fundashon Karnaval Kòrsou.
Bertilio ta kumpli 25 aña trahando ku Fundashon Kultural Seú Kòrsou. Pa basta aña Bertilio tabata kolaboradó, kordinadó di e proseso pa kùrmentu di vehíkulonan pa Marcha di Seú i tambe Bertilio ta enkabesá Marcha di Seú.

SHERWIN ANITA
Dia 15 di sèptèmber 2017 e grupo di tambú, Pincho i su grupo, a selebrá su di 40 aña di eksistensia.
Pincho a kombertí su mes den un multifasétiko kultural, ku ta dediká su mes na entre otro siña hóbennan diferente disiplina manera baile di seú, tambú i kaha di òrgel.
Pincho i su grupo a risibí diferente premio i rekonosementu. E intenshon di Pincho i su grupo ta pa sigui informá i forma e hóbennan riba tereno kultural. Na tur Pincho tin por lo ménos 575 komposishon skibi.

REKONOSEMENTU SPESIAL
Huntu ku e tres homenahiadonan Fundashon Kultural Seú Kòrsou a duna rekonosementu spesial na tres persona, Frensio Jamanika, Shannon Richardson i Ludwig Isabella (Dj Danger).

SHARE

LEAVE A REPLY