E temibel narkotrafikante mexicano Nemesio Oseguera, “El Mencho”, kende aparentemente a risibi un menshon spesial durante di un konsierto.
CIUDAD DE MEXICO (AFP).- Un imágen di Nemesio Oseguera, alias “El Mencho”, lider di e poderoso Cártel Jalisco Nueva Generación (CJNG), a keda proyektá den wikènt último durante di un konsierto den parti wèst di México, loke a generá hopi krítika di parti di presidente Claudia Sheinbaum.
E imágen di Oseguera a keda proyektá djasabra durante di un konsierto dje grupo di musika regional “Los Alegres del Barranco” na e siudat Guadalajara, den e estado di Jalisko, kaminda na kuminsamentu di mart a deskubrí un aparente sentro di ‘training’ di krímen organisá.
E imágen a aparesé ora ku e grupo tabata interpretá “El dueño del palenque”, un ‘corrido’ (kansion) skirbí aparentemente na honor di “Mencho”.
E suseso a haña hopi krítika di outoridatnan lokal i federal, sigur p’e hecho ku Jalisco, sede di CJNG, ta un dje siudatnan mas gòlpiá pa violensia kriminal na Mexico i e region kaminda mas tantu di hende ku a pèrdè den e pais.
Outoridatnan merikano ta ofresé un rekompensa di 15 mion dollar pa informashon ku ta hiba na kaptura di Oseguera.
E ouditorio Telmex, kaminda e konsierto a tuma lugá, a bisa di no tabatin konosementu di e kontenido ku lo a keda presentá di parti dje artistanan.
Pa algun dékada kaba, grupo di músika regional mexicano ta interpretá “narco corridos”, kansionnan riba narkotráfiko i nan lidernan.
