WILLEMSTAD.- Ronald McDonald House Charities (RMHC) ta pasa pa Ronald McDonald House Curaçao. Komunidat di Kòrsou, partnernan i boluntarionan lo nota kambionan eksterno; manera e logo, wèpsait, medionan sosial i e-mailnan kual lo hiba un imágen nobo pero di paden, tur kos ta keda meskos: Ronald McDonald House lo sigui dediká na famianan ku muchanan malu di mes manera ku nan a bin ta hasi esaki último 16 aña na Kòrsou. E mishon di e fundashon no ta kambia: tene famianan serka di otro ora un mucha ta malu i mester di kuido médiko.
Ronald McDonald House Curaçao, ta lansa nan ‘brand’ nobo.
Komo parti di esfuerso pa uni e diferente kasnan di Ronald McDonald mundialmente e organisashon global a lansa un imágen nobo diseñá pa fortalesé e konsientisashon di nan mishon i amplia e impakto pa generashonnan benidero. Mas ku un imágen nobo, e evolushon aki ta reflehá ken semper nos tabata i e direkshon ku nos ta bai huntu.
Ronald McDonald House ta un fundashon global kual ya tin 16 aña establesí na Kòrsou i ta situá den Curaçao Medical Center.
E mishon prinsipal di e organisashon ta pa famianan keda huntu (Family Stays) den momentunan kaminda un mucha ta malu. E fundashon ta proveé servisio esensial ku ta kita bareranan, fortalesé famianan i promové sanashon ora muchanan mester di kuido hospitalario. Esaki nan ta hasi ofresiendo famianan diferente servisio manera un espasio pa drumi den hòspital, kuminda kayente mèrdia, sosten emoshonal, servisio di transporte i mas.
Tur esaki ta posibel danki na mas ku 60 boluntario ku ta duna nan tempu pa brinda famianan un espasio trankil i seif i tambe kompanianan lokal ku ta sostené e fundashon pa medio di donashon.
Durante añanan Ronald McDonald house a yuda mas ku 24.000 famia i proveé mas ku 4000 kuminda kayente ku e meta pa fasilitá e bida di famianan durante momentunan difísil.
Ku e ‘brand’ nobo e fundashon ta sigui pone famia sentral i ta enfatisá e idiologia di Family Centered Care mustrando ku famia ta forma un parti krusial di e proseso di sanashon di un mucha pasó na momentu ku un mucha ta malu, e famia tambe ta malu.
Direktiva di Ronald McDonald House Curaçao ta enfatisá nan kompromiso na famianan lokal pero tambe internashonal i ta sigurá ku e ‘rebrand’ ta solamente visual pero e dedikashon i kurason pa e trabou diario ta keda igual.
