Museo di Mucha Kòrsou i Van den Tweel Supermarket ta selebrá
WILLEMSTAD.- Museo di Mucha Kòrsou i Van den Tweel Supermarket a selebrá renobashon di e mini supermerkado den Museo di Mucha na un manera festivo. Danki na un kolaborashon estrecho, a modernisá e eksposishon stimá aki, miéntras ku a konservá e eksperensia di wega edukativo. Pa selebrá e kolaborashon, a organisá riba 13 di yüli un ‘soft opening’ eksklusivo pa e empleadonan di Van den Tweel Supermarket i nan yunan.
Un di e eksposishonnan mas popular na Museo di Mucha
E mini supermerkado ta un di e eksposishonnan mas popular i mas bishitá desde ku Museo di Mucha a habri. Investigashon hasí ku bishitantenan ta mustra ku muchanan ta gusta regresá aki pa hasi kompra huntu, surti produktonan, traha na kaha i hunga vários ròl di bida diario.
Meskos ku tur eksposishon den Museo di Mucha, a desaroyá e supermerkado tambe basá riba e vishon di siña dor di hunga. Miéntras muchanan ta dibertí, sin sa, nan ta desaroyá abilidatnan importante manera kolaborashon, komunikashon, aritmétika, kontamentu, pisamentu, hasi eskoho i interakshon sosial. Esaki ta hasi e supermerkado no solamente un área di wega dibertido, pero tambe un ambiente di siña pedagogikamente sano kaminda wega i desaroyo ta bai man den man.
Un aspekto fresku pa un eksposishon stimá
Danki na Van den Tweel Supermarket, e mini supermerkado a haña un update kontemporáneo. No pa reinventá e eksposishon, pero pa duna un di e áreanan di wega mas stimá di Museo di Mucha un aspekto fresku, rekonosibel i kla pa futuro. Asin’aki ta sigurá ku e eksposishon popular aki, tambe pa añanan benidero, ta keda un lugá inspirativo kaminda hungando muchanan por deskubrí i siña.
Un apertura festivo pa empleadonan i nan famia
Durante e ‘soft opening’ empleadonan di Van den Tweel Supermarket i nan yunan tabata e proménan ku a haña e oportunidat pa deskubrí e supermerkado renobá. E bishitantenan hóben a risibí un mini sertifikado di Van den Tweel Supermarket, nan por a partisipá den aktividatnan di klùr i a bai kas ku un ‘goodie bag’ bon yená. E maskota di Van den Tweel tambe tabata presente pa un akohida festivo i oportunidatnan dibertido pa saka potrèt.
Un kolaborashon sostenibel
Ku e kolaborashon aki Van den Tweel Supermarket ta suprayá su kompromiso sosial pa ku desaroyo di muchanan na Kòrsou. Komo sosio patrosinadó, Van den Tweel ta kontribuí na preservashon i mantenshon di un di e eksposishonnan mas stimá di Museo di Mucha, di manera ku aki futuro generashonnan por sigui siña hungando.
Museo di Mucha Kòrsou i Van den Tweel Supermarket ta antisipá ku orguyo riba un kolaborashon a largo plaso i ta invitá tur famia di Kòrsou, pa durante di fakansi grandi, bin eksperensiá pa nan mes, e mini supermerkado renobá .
Tokante Van den Tweel Supermarket
Van den Tweel Supermarket ya pa añanan largu ta un supermerkado di konfiansa na Kòrsou i fuera di duna servisio di kalidat, tambe ta sostené aktivamente inisiativanan sosial ku ta kontribuí na desaroyo di e komunidat.
Riba e kombinashon di fotonan un bista di e muchanan ta dibertí nan mes den e mini supermerkado di van den Tweel na Museo di Mucha
