Despues di 16 ora bula for di Fransia pa Kòrsou

WILLEMSTAD. – Dia 26 di desèmber tras di lomba, famia de Vroet-Jacobs a pasa un eksperensia amargo ora ku nan a yega Kòrsou despues di un buelo di 16 ora, pa bira nan bèk riba e mesun buelo. Ni maske kiko e famia, esta un pareha di kua e señora ta nasé di un pareha hulandes-antiano i a krese aki na Kòrsou, no a yuda ku nada. E famia a sera nan restorant na Fransia pa nan por pasa vakashon aki na Kòrsou pa 5 siman largu i asina e señora por pasa e dianan di fiesta di fin di aña ku su mayornan aki na Kòrsou, pero despues di 36 ora di buelo, nan tabata bèk na kas na Fransia.

E famia ta bisa ku nan a prepará 9 luna largu pa e vakashon aki. Nan a sòru pa nan tin tur kos na òrdu, esta tur dokumentonan, konsiente di COVID-19 i a skohe KLM pa biaha pa Kòrsou.

No ta promé biaha e pareha ku nan yu di tres aña ta bishitá Kòrsou, pero ta tur aña nan ta bin Kòrsou ku vakashon. Tur aña nan ta sera nan restorant i pa pasa dianan di fiesta aki na Kòrsou den seno familiar.

E aña aki ta meskos, ounke konsiente di e impakto di COVID-19, nan a prepará bon pa esaki, asta nan a keda dos siman den karentena na nan mes kas na Fransia, pa motibu ku e reunion familiar ta hopi importante pa e famia.

E famia ta sali for di Bordeaux pa Kòrsou i ta trata di un buelo di 16 ora. E famia ta bula den “businessclass” i hopi entusiasmá pa yega Kòrsou.

E loke ku e famia no a pensa nunka di nan bida ku lo pasa ku nan, un pais ku nan ta bin tur aña i tambe nan mayornan ta biba aki, a keda poné den un forma denigrante riba buelo bèk pa Fransia. Ni maske kiko nan a hasi i puntra kiko a bai robes, niun hende no por a duna un kontesta satisfaktorio. Ora ku e famia a kuminsá insistí ku nan ke sa dikon no ta permití nan drenta Kòrsou, personal di imigrashon a kuminsá zundra nan na mala òrdu i a bisa ku ta nan ta disidí ken ta drenta i ken no ta drenta Kòrsou.

E famia ta bisa ku si tin algu robes, e ora ei ta KLM a laga nan subi avion sin ku tur kos ta na òrdu, pero KLM a laga nan subi avion i nan ta bou di e impreshon ku tur dokumento ta na òrdu. Esaki aló ménos loke ku e famia ta pensa, pa motibu ku no tin splikashon kiko ta robes.

Ora ku nan a pidi pa nan keda den karentena pa dos siman, mirando e echo ku nan ta planiá pa keda Kòrsou 5 siman, tampoko a yuda den nan kousa.

Finalmente despues di a soportá hopi zundramentu i humiashon, literalmente a bisa nan pa bai for di Kòrsou esta pafó. Ku awa nan wowo e pareha i nan yu di 3 aña a abordá KLM rumbo bèk Fransia.

E yu di 3 aña tur traumatisá dor di mira su mayornan ta sklama ku awa na wowo, ta subi avion, pa bolbe bula 16 ora.

E loke ku a kaba di kibra e famia mas tantu ainda, ta ku nan a bula “businessclass” bin Kòrsou, pero riba e buelo di regreso a pròpnan te patras di e avion. E famia no por a imaginá nan ku nan ta den un pelíkula dramátiko,  anto sin  haña splikashon di kiko a tene nan afó.

For di e dia ei, nan ta buska kontakto ku tur hende ku ta posibel pa nan por haña un splikashon, pero sin resultado.

Den e último 5 dianan, nan a bèl KLM mas di 17 biaha, a manda 16 sms i na dos okashon a logra haña hende na telefòn ku a pone nan warda i nan warda 1 ora largu sin niun hende a bin na telefòn i e otro biaha a bisa nan ku nan dosié ta den investigashon, pero te awe sin un splikashon, sin nada konkreto e famia tin di dil ku nan eksperensia traumátiko.

E famia ta di opinion ku nan no a hasi nada robes, nan a haña tur OK di KLM pa abordá e avion i KLM no ta duna oido. E famia ta sinti ku a laga nan desampará.

 

4 COMMENTS

  1. Abuso di poder maluso di autoridat demanda nan pa danjo di perwisio..foi ora nan no tin un balido wettelijke basis pa nan aktua asina ta un onrechtmatige daad y gobiernu di kada un pais ta responsabel pa kada ser humano ku pisa su suela mester hanja un tratu humano digno.

  2. Korsow korsow. Ma nanse na korsow. Pero lagami bisabu ku si no sinja trata hende anto korsow lo pasa den kos. E yu di korsow manera nan ta yama nan mes no ta kere ku kos por boltu pone ku korsow ta hanje den situashon nan manera diferente Islanan den Caribe. Por ehempel Santo Domingo ku ta produsi mas ku Korsow. Na tur kos. Korsow no tin nada. Si turismo basha abao Dios spar e yu di korsow. Kada bes mi ta resa kon ta yama korsow un pais . Korsow ta un isla . E loke ta trese plaka na korsow ta su Solo. Anto niun di esnan ku ta yama nan mes yu di korsow no ta benefisia di dje. Ta stanjero nan so ta traha plaka kune. Stop di kompara . Na mundu no tin niun Pais ni niun Isla ku e hendenan ta husa yu dilanti nan Origen. Ta korsow so. Yu ku di P.

    • Abuzo di poder y sin heful pasobra nan tin un uniform bisti. Wak e kos aki desaparece den doofpot pasobra niun hende no ta tuma responsabilidad.

  3. Hopi jammer pa e famia, mita spera nan por solushona e problema via un abogado i despues purba lubida trauma aki.

    E trahadonan na korsow ta hopi frustrá, pa e motibu ei mino por papia nada bon di e trato nan den tienda, na hato i ningun kaminda kubo tinku verwacht un service.

    Jammer si un Isla chiki i bunita asina, ta wordu danjá.

LAGA UN KOMENTARIO

Please enter your comment!
Please enter your name here