NEW DELHI, INDIA, AFP.- India a reportá mas di 4.000 morto kousa pa Corona vírus den un dia pa promé biaha i mas estado a imponé medidanan di ‘lockdown’ djasabra den un intento desesperá pa kontené e brote nobo di COVID-19.
E 4.187 mortonan nobo a oumentá e total na 238.270 desde ku e pandemia a kuminsá. E pais a reportá 401.078 kaso nobo di infekshon den 24 ora subiendo e kantidat total na kasi 21,9 mion. Esaki ta na di dos lugá despues di Merka.
Ekspertonan a ekspresá duda den e kantidat ofisial di morto reportá i a agregá ku e pais lo registrá un ‘peak’ den su kasonan pa fin di mei.
Rahul Gandhi, e lider di e partido opositor di Kongreso a pidi Promé Minister Narendra Modi pa imponé un ‘lockdown’ nashonal pa kontené e krísis ku ta afektando India i tambe otro nashonnan.
E gobièrnu a keda kritiká pa e forma kon a manehá e krísis. Mayoria atministrashon estatal ta na enkargo di nan propio medidanan di ‘lockdown’.
