Riba e potrèt por mira e mucha di 5 aña, Lima Conejo Ramos, kende agentenan di ICE a usa pa por detené su mayornan.
MINNEAPOLIS (AFP).- E detenshon di un mucha hòmber di 5 aña durante di un razia kontra di migrantenan na Minneapolis a sòru pa indignashon den e siudat aki den parti nort di Merka, kaminda a konvoká un dia di protesta kontra di akshon dje agentenan.
Míles di agente di Servisio di Inmigrashon i Kontrol di Duana (ICE) ta den Minneapolis komo parti dje kampaña di presidente Donald Trump kontra di migrashon. Liam Conejo Ramos, di sinku aña, i su tata Adrian Conejo Arias (ekuatoriano) a keda detené ora ku nan a yega nan kas, segun Zena Stenvik, direktor dje skolnan públiko di Columbia Heights, kaminda e yu ta bai. E mucha a keda usá pa e agentenan di ICE komo “garná” pa bati na porta di su kas i logra saka esnan ku tabata paden, segun Stenvik. Riba retnan sosial a publiká un potrèt di un mucha ku un pèchi blou di konènchi miéntras ku un persona bistí na pretu ta tené na su suèter.
E vise presidente di Merka, JD Vance, a konfirmá ku e mucha ta entre esnan detené, pero a splika ku e agentenan a proteh’é despues ku su tata a “hui” durante dje razia. “Kiko mester a hasi? Mester a laga e mucha di sinku aña muri den friu?”, segun JD Vance a kuestioná.
E kongresista demokrat Joaquin Castro a rechasá e splikashon di Vance i a kalifiká e outoridatnan di Seguridat Nashonal di ta “gañadónan kompulsivo”. El a agregá ku su ekipo no a logra na lokalisá e menor, kende segun informenan a keda trasladá huntu ku su tata pa un sentro di detenshon na San Antonio.
E eks visepresidente Kamala Harris tambe a rechasá kapturá dje menor: “Liam Ramos ta un mucha. E mester ta na kas ku su famia, no usá di parti di ICE komo garná i detené den un sentro di detenshon”, segun el a skirbi riba X.
Segun e abogado Mark Prokosch, ku ta asistí e famia, e mucha i su tata a kumpli ku e pasonan legal solisitando asilo na Minneapolis, un siudat kaminda ku polisnan no ta koperá ku e razianan migratorio federal.
Demostrashon ayera na Minneapolis kontra presensia di agentenan di ICE den e siudat, komo tambe pa e manera ku nan a detené un mucha di 5 aña.
