WASHINGTON, MERKA, AFP.- E panorama di inflashon na Merka a empeorá desde komienso di aña, kual por prolongá e bataya aktual di Reserva Federal kontra oumento di preis, segun indikashon di un funshonario haltu di Fed.
E banko sentral “por haña mas trabou pa hasi” den su lucha kontra inflashon si e datonan “sigui mustra ku ekonomia a bira fuerte i un desinflashon mas slou”, asina Lisa Cook, miembro di e komité di tasa di Fed a bisa den un diskurso pa un konferensia na Ohio.
Fed a subi su tasa di referensia nuebe biaha desde mart 2022 pa redusí e inflashon histórikamente haltu.
Pero e agitashon resien den e sektor bankario kousá pa e bankarota di e banko Silicon Valley Bank a pone ku Fed a rekonsiderá un oumento drástiko den mart i a opta pa un oumento mas chikitu, di un kuart porshento.
E presidente di Fed, Jerome Powell a sugirí despues di e desishon ku Fed por subi tasanan di interes solamente un biaha mas promé ku pone fin na su siklo di subimentu di tasa aktual.
