ADIS ABEBA, ETIOPIA, AP.- E pilotonan di avion Ethiopian Airlines kual a kai luna pasá a ehersé tur prosedura rekomendá pa Boeing na momentu ku e avion a kuminsá kai, ounke nan no a logra kontrolá esaki, segun un rapòrt preliminar publiká pa e gobièrnu etiope djaweps.

E informe basá riba datonan registrá pa e dos aparatonan ku ta graba dato di buelo i bos den kabina di e Boeing 737 MAX a revelá ku un sensor dañá den e avion a provoká un serie di evento kousando ku e pilotonan a pèrdè kontròl di e avion. Segun e informe di ofisina di Investigashon di Aksidente di aviashon etiope, e problemanan di e sensor a kuminsá un minüt despues ku e avion a haña outorisashon pa lanta buelo.

E problemanan ta similar na esnan ku Lion Air di Indonesia a denunsiá. E avion a kai den òktober.

Segun e informe, e number pa determiná e velosidat aéreo i aktitut den e sensor na man robes di e 737 MAX tabata diferente na e sensor drechi, kual a kousa problema pa kontrolá e avion, i definitivamente e pilotonan no por a impedí e kaida.

E revelashonnan ta kontradesí e afirmashonnan di Boeing i reguladornan merikano ku a indiká ku e piloto por rekuperá kontròl den algun emergensia si nan sigui e prosedernan di un sistema diseñá spesialmente pa e MAX.

LAGA UN KOMENTARIO

Please enter your comment!
Please enter your name here